Як кажуць, дрэнны той выпускнік, які не марыць здаць цэнтралізаванае тэсціраванне на 100 балаў. Вось толькі, улічваючы складанасць заданняў, мала ў каго гэта атрымліваецца – сёлета такі вынік у нашай краіне рэгістраваўся 401 раз. Прыемная навіна прыйшла і ў наш раён – “узорнае” пасведчанне на ЦТ па хіміі атрымаў выпускнік Ушацкай сярэдняй школы Марат Клачок.
– Не скажу, што як дыпламант абласнога і заключнага этапаў рэспубліканскай алімпіяды па прадмеце быў упэўнены ў настолькі высокім выніку. Але надзею, канечне, не губляў, – прызнаецца хлопец. – Заданні былі дастаткова складаныя. Дарэчы, сёлета іх стала менш у частцы “А” і больш – у “В”, дзе прасцей дапусціць памылку ў разліках. Напэўна, таму колькасць “стобальнікаў” убавілася – сёлета ўсяго 24 з 10 тысяч тэсціруемых.
Трапіць у іх лік дапамаглі не толькі грунтоўныя веды па хіміі, якія Марат набываў з настаўніцай Аленай Васільеўнай Марозавай, але і ўдзел у рэпетыцыйным тэсціраванні, якое праходзіў тройчы. Цікава, што кожны раз дэманстраваў лепшы вынік: спачатку было 78 балаў, потым – 90 і 93.
– Уся справа – у няўважлівасці, несабранасці, якія авалодвалі з непрывычкі, – прызнаецца юнак. – Пакуль “акуратнічаў” з запаўненнем бланкаў, губляў час і не паспяваў выканаць заданні. Не ўбачыў слова ці нават адзін сімвал – і рашэнне ўсёй задачы ішло пад адхон. Таму такая трэніроўка прынесла карысць – непасрэдна на ЦТ адчуваў сябе ўпэўнена і спакойна.
100-працэнтнаму выніку па хіміі блізкія Марата асабліва не здзівіліся – верылі ў яго сілы. Парадаваліся і балам, набраным па іншых прадметах: фізіцы – 87, матэматыцы – 77, рускай мове – 85. Улічваючы ж тое, што сярэдні бал атэстата склаў 9,6, у шансах хлопца на паступленне ніхто не сумняваецца. Сёння ён павёз дакументы на хімічны факультэт Белдзяржуніверсітэта, дзе выбраў спецыяльнасць “Хімія (фармацэўтычная дзейнасць)”. Пажадаем Марату ўдачы!
Кацярына КАВАЛЕЎСКАЯ.