Ці можа такое быць, каб аграрый быў усім задаволены? Як руплівы гаспадар, ён крытычна ацэніць вынік, засмуціцца недаробленым, пабядуе над згубленым. І, як спрадвечны аптыміст, задаволена ўсміхнецца, аглядаючы атрыманае, парадуецца вырашчанаму і абавязкова намеціць планы на чарговы ўраджай. На гэтым трымаецца сонцазварот сялянскага ўкладу. На працавітасці і вопыце, аптымізме і жыццялюбстве. Інакш нічога не атрымалася б у такой рызыкоўнай і такой высакароднай справе. А вынік ёсць. Вельмі неблагі ён ва ўшацкіх аграрыяў сёлета. І напярэдадні прафесійнага свята мы з начальнікам райсельгасхарча, першым намеснікам старшыні райвыканкама А.Я.ВАЙЦЯНКОВЫМ падводзілі вынікі чарговага сельскагаспадарчага года.
– Аляксандр Ягоравіч, што парадавала ў сёлетні сезон?
– Больш за ўсё, канечне, рэкордны за апошнія гады ўраджай зерневых – 30750 тон хлеба пры ўраджайнасці 21,5 цэнтнера з гектара. Гэта амаль у паўтара раза больш за мінулагодні вынік і лепшы паказчык за апошнія 16 год. Больш за ўсю гісторыю развіцця сельскай гаспадаркі Ушаччыны было толькі ў 1994 – 31068 тон, 1987 – 41310 і 1993 – 44344. Прычым, жніво прайшло арганізавана, зладжана, у максімальна сціслыя тэрміны. Раён выканаў дзяржзаказ, засыпаў насенне не толькі ў асноўны, але і страхавы і пераходныя фонды.
– Давайце адзначым тых, чый уклад у “каравай” самы важкі.
– У чарговы раз лепшыя вынікі ў вырошчванні зерня ў “Дземенцы” – з аднаго гектара тут атрымана 26,4 цэнтнера, больш 22 – у “Агра-Селішчы” і “Глыбачанах”. А самы вялікі валавы збор сёлета ў ААТ “Ільюшынскі” – намалочана 5599 тон, або 127,5 працэнта, на 196 працэнтаў выкананы дзяржзаказ, прычым на 118 – па піваварным ячмені. Акрамя гэтага ў 2,5 раза больш вырасцілі рапсу і ў 1,8 — бульбы. Лепшы паказчык па ўраджайнасці рапсу (15,7) мае “Вялікадолецкае”. “Дземенец” атрымаў выдатны ўраджай грэчкі — 18 цэнтнераў з гектара.
– Летась гаспадаркі “на выдатна” спрацавалі з харчовай бяспекай уласнай жывёлагадоўлі і нават прадавалі лішкі. Як з кармамі сёлета?
– Раён з 2008 года забяспечвае сябе кармамі ў поўным аб’ёме. Мы справіліся з асноўнай задачай – накармілі жывёлу, прычым якаснымі кармамі. Сёлета нарыхтавана 31,4 тысячы тон кармавых адзінак пры заданні 28, або 31,2 цэнтнера на ўмоўную галаву жывёлы. У “Глыбачанах” – 37,4 – гэта самы высокі паказчык па раёне і на 51 працэнт вышэй леташняга выніку гаспадаркі. Паўтарагадовы запас кармоў у “Вялікадолецкім”, “Селішчы”, “Дземенцы”. І назіраецца станоўчая дынаміка ў жывёлагадоўлі – асноўнай таварнай галіне. Вытворчасць малака за 10 месяцаў на 4,6 працэнта больш за мінулагодні паказчык, а ў “Кублічах” – на 22 працэнты, гэта гаспадарка за 10 месяцаў атрымала на карову 3019 кілаграмаў.
– Ёсць у раёне чатырохтысячныя надоі і высокія прывагі.
– Так. Па 4 тысячы ад каровы ўжо атрымалі Марыя Пятроўна Шорац і Ніна Васільеўна Усцін з “Ушацкага райаграсэрвіса”. У Валянціны Іванаўны Волах з гэтага ж прадпрыемства — 3895. Ларыса Васільеўна Пчолка з “Ільюшынскага” надаіла ад каровы 3865 кілаграмаў, 3820 – у Таццяны Сцяпанаўны Пуі і 3149 – Валянціны Васільеўны Хамічонак з “Вялікадолецкага”. А больш высокія прывагі на вырошчванні буйной рагатай жывёлы атрыманы на комплексе “Райаграсэрвіса”: звяном Ірыны Васільеўны Крук – 773 грамы, Уладзіміра Валер’евіча Літвіна – 764. Лепшыя ж прывагі сярод аператараў гаспадарак у звяна Тамары Пятроўны Казачонак з “Вялікадолецкага” – 697.
Я назваў далёка не ўсіх перадавікоў, пераможцаў спаборніцтва, хоць на агульны вынік працавала вялікая армія аграрыяў. Літаральна ўсіх работнікаў гаспадарак, а таксама ветэранаў галіны, якія, упэўнены, цікавяцца справамі аграпрамысловага комплексу раёна, віншую са святам, жадаю новых працоўных дасягненняў, моцнага здароўя, сямейнага дабрабыту, асабістага шчасця, а таксама ўпэўненасці ў заўтрашнім дні. Словы падзякі хочацца выказаць нашым шэфам, якія падстаўлялі плячо ў напружаныя моманты: работнікам прадпрыемства меліярацыйных сістэм, лясгаса, камунгаса, райспажыўтаварыства, а таксама спецыялістам усіх тых арганізацый, якія аказвалі дапамогу ва ўборцы льну, бульбы, іншых сельскагаспадарчых работах.
Яшчэ раз – вялікі дзякуй усім і ўсяго самага найлепшага вам і вашым блізкім.