Ці можна выбраць самую неабходную прафесію? Адну, напэўна, не атрымаецца, а вось калі некалькі, то ў гэтым спісе абавязкова будуць камунальнікі.
І паказальны выпадак паўстае ў памяці заўсёды. На вечары-сустрэчы выпускнікоў адзін з удзячных аднакласнікаў расказваў свайму былому аднакласніку-выдатніку пра месца працы. “Я сяджу за пультам водаканала, і калі ўсяго на пяць хвілін не так пераключу пульт, паўгорада застанецца без вады”.
Няма вады, не надта цёпла ў кватэрах, не расчышчаны вуліцы, пустая пясочніца ў двары… Гэта ўсё да службы жыллёва-камунальнай гаспадаркі, якая пры дэфіцыце сродкаў імкнецца, каб мы з вамі менш адчувалі нязручнасці.
Да абслугоўвання ўсяго гарпасёлка далучыліся і практычна ўсе дарогі па населеных пунктах, цеплавыя сеткі і водазабеспячэнне, і няма такога сезона, каб камунальнікі былі без работы, і такога дня, каб не паступалі званкі. Сёлетнюю ж зіму ўсе службы былі запатрабаваны больш чым калі. Да традыцыйных абавязкаў далучыліся і незапланаваныя – моцных маразоў не вытрымалі многія водаправодныя сеткі, штодня камунальнікаў чакалі прыкладна ў 20 вёсках раёна. Быў падоўжаны рабочы дзень і прыцягвалася дадатковая тэхніка для расчысткі дарог. А зараз вось і паводка.
Былі, канечне, і застаюцца незадаволеныя, аднак пераважна з-за таго, што не хапае сродкаў. А вось у чым нельга адказаць камунальнікам – гэта ў хуткім рэагаванні на паступіўшыя звароты, імкненні разабрацца ў сітуацыі і дапамагчы людзям. Прычым, пры ўхіленні няспраўнасці яны часта працуюць і ў няўрочны час.
Іх работа вельмі часта нябачная, паколькі недзе там – пад зямлёй, у падвалах, на гарышчах. Аднак менавіта па ёй ацэньваюць знешні выгляд горада.
У пятніцу вялікі калектыў камунгаса сабраўся на ўрачыстасць з нагоды прафесійнага свята. На сцэну падымаліся людзі, работа якіх адзначана. Ёсць сёлета і вельмі высокія ўзнагароды. Званне “Ганаровы работнік жыллёва-камунальнай гаспадаркі” прысвоена галоўнаму бухгалтару прадпрыемства Людміле Васільеўне Губанковай. Ганаровую грамату міністэрства атрымаў брыгадзір арэхаўскага ўчастка Віктар Міхайлавіч Шыркевіч. Людзі, якія практычна ўсё сваё жыццё прысвяцілі камунальнай гаспадарцы.
