Гісторыю можна вывучаць па-рознаму — штудзіраваць дакладныя акадэмічныя крыніцы, музейныя архівы, або паглыбляцца ў гістарычныя раманы, дзе факты даўніны ў значнай ступені перабольшаны фантазіяй аўтара, а вымысел не адрозніць ад рэчаіснасці. Ушачане ж зараз могуць скарыстацца іншым, больш цікавым спосабам знаёмства з мінулым.
Той факт, што касцюміраваную гістарычную выставу васковых фігур «Кола гісторыі» ва Ушачах маюць магчымасць убачыць аднымі з першых у краіне, абумоўлены двума акалічнасцямі. Па-першае, гэта наяўнасць значных плошчаў у нашым музеі народнай славы. Другая і галоўная прычына — цікаўнасць ушачан да мінулагодняй выставы арганізатараў і адносіны раённай улады, якая заўсёды ідзе насустрач у пытаннях арганізацыі культурных мерапрыемстваў на тэрыторыі раёна. Гэта падчас урачыстага адкрыцця 17 кастрычніка падкрэсліў адзін з арганізатараў выставы, прадстаўнік расійска-японскага культурнага цэнтра Уладзіслаў Уладзіміравіч Фамін. «Без мінулага няма будучыні», — такімі словамі ад імя раённай улады вітала шматлікіх гасцей самага рознага ўзросту старшыня раённага Савета дэпутатаў В.М.Захарэнка.
На выставе ў храналагічным парадку ад глыбіні сярэднявечча да сучаснасці прадстаўлены каля 30 фігур з музея Петрапаўлаўскай крэпасці, што дазваляе без дапамогі машыны часу перанесціся на стагоддзі назад, у рэжыме нон-стоп можна прагледзець фільмы, дзе расказваюцца шчаслівыя, але часцей сумныя факты з біяграфіі знакавых гістарычных асоб. Сярод іх — вялікія рэфарматары Пётр I, Мікалай II, палітычныя дзеячы мінулых стагоддзяў і сучаснасці К.Маркс, У.Ленін, І.Сталін, У.Чэрчыль, Ф.Рузвельт, М.Хрушчоў, М.Гарбачоў, У.Пуцін, вялікія таленты А.Пушкін, В.Моцарт і іх злыя геніі Дантэс і Сальеры.
Дзейнасць і жыццёвы шлях многіх прадстаўленых на выставе персанажаў ляглі ў аснову твораў літаратуры, мастацтва і кінематаграфіі. Для розных пакаленняў учынкі гэтых герояў з’яўляюцца арыенцірамі і ў сучасным жыцці. Іншыя, як Ілжэдзмітрый, Казанова, маркіз дэ Сад, Іван Грозны, Адольф Гітлер, наадварот, выступаюць прыкладамі супярэчлівасці, жорсткасці і авантурызму. Праўду і вымысел пра барона Мюнхгаўзена, Распуціна, імператрыцу Кацярыну I і іншых асоб раскажа экскурсавод і матэрыялы выставы.
Фігуры персанажаў выкананы ў натуральную велічыню і ўражваюць падабенствам з жывымі людзьмі. Наведвальнікі могуць сфатаграфавацца побач са знакамітасцямі, асабліва гэтым карыстаецца моладзь, якая з першых дзён работы выставы праяўляе да яе вялікую цікаўнасць. Застаецца нагадаць, што васковыя фігуры будуць выстаўлены ў музеі народнай славы да 26 кастрычніка. Выстава працуе з 10 да 19 гадзін без выхадных і перапынкаў на абед.
Д.РАМАНОЎСКІ.
Отличная статья. Интересная выставка.