На гэтым тыдні ў час вясенніх канікул Ушацкая школа зусім не апусцела. Нягледзячы на тое, што ў гэтыя дні няма заняткаў, з раніцы тут звіняць дзіцячыя галасы. На працягу тыдня ў навучальнай установе дзейнічае аздараўленчы лагер дзённага прабывання “Сонейка”, які наведваюць 50 чалавек, у асноўным гэта вучні першага і другога класаў.
Сумаваць тут малодшым школьнікам не прыходзіцца, праграма лагера насычаная і пазнавальная. Адкрылася яна выставай “Яе вялікасць – кніга”, падрыхтаваная пры ўдзеле дзіцячай і школьнай бібліятэк. Вельмі зацікавіла дзяцей і мерапрыемства “Крынічка экалагічных ведаў”. Ужо паспелі адчуць сябе школьнікі і дактарамі, толькі ў якасці пацыентаў былі не людзі, а кнігі, арганізавалі цэлую “кніжкіну бальніцу”! Праверылі свае веды ўдзельнікі лагера падчас конкурсу знатакоў птушак, а таксама на літаратурным рынгу. Цікавыя танцавальназабаўляльныя праграмы “Атам і малекула”, “Вясеннія матывы”, “Гуляем у тэатр” для наведвальнікаў “Сонейка” падрыхтаваў і цэнтр дзяцей і моладзі. Тут жа ў канцы тыдня пройдзе і яшчэ адно цікавае мерапрыемства – гадзіна караоке “ Вясенняя капель”. Арганізатары лагера падрыхтавалі для дзяцей і мерапрыемствы, прымеркаваныя да 70годдзя Вялікай Перамогі – мультымедыйную прэзентацыю “Героі, застыўшыя ў бронзе”, а таксама гульню “Рэха вайны мінулага”.
І, канечне, кожны дзень у лагеры праводзяцца спартыўная і музычная гадзіны, каб за канікулярны тыдзень дзеці адпачылі і аздаравіліся.
Вольга КАМАРКОВА.