Праблема, якую ў сваім звароце ў рэдакцыю газеты ўзняў жыхар гарпасёлка Васіль Макаравіч Пятніца (“З нагоды выгоды”, № 23 ад 25 сакавіка 2015 г.), на самой справе не зусім адпавядае рэчаіснасці. Механізм вырашэння пытанняў па будаўніцтве пад’ездаў і паніжэнняў да домаўладанняў грамадзян пры ўкладцы тратуараў па вуліцах гарпасёлка адпрацаваны гадамі. Усе работнікі арганізацый, якія выконваюць указаны від работ (Ушацкае ПМС, ДРБУ-105), папярэджаны аб тым, што па жаданні грамадзян і з іх згоды да кожнай з сядзіб неабходна ўладкоўваць як мінімум адзін з’езд або паніжэнне – гаворка ідзе якраз аб выгодах. Іншая справа, што некаторым гаспадарам пад’езд спачатку аказваецца быццам бы і непатрэбным, а потым неабходнасць у яго будаўніцтве раптам з’яўляецца. Ідучы насустрач людзям, будаўнічыя арганізацыі ламаюць ужо пакладзенае дарожнае пакрыццё, марнуючы час, сродкі і адцягваючы работнікаў з іншых аб’ектаў. Таму ўсім гаспадарам, якія жывуць на вуліцах, дзе вядуцца работы па будаўніцтве тратуараў і ўкладцы асфальту, раю не “спаць у шапку”, а загадзя звяртацца да будаўнікоў для вырашэння падобных пытанняў, і яны вам не адмовяць, бо кроўна ў гэтым зацікаўлены: рабіць адразу заўсёды прасцей і танней, чым перарабляць.
Што датычыцца пытання В.М.Пятніцы, то яно разгледжана з выездам на месца з удзелам майстра ДРБУ-105 і ,верталёт для дастаўкі ўгнаенняў гаспадару не спатрэбіцца – паніжэнне да яго домаўладання на завулку Кастрычніцкім будзе выканана не пазней наступнага тыдня.
А.ЛОСЕЎ, дырэктар упраўлення капітальнага будаўніцтва Ушацкага раёна.