Спаборніцтвы як метад павышэння прафесійнага майстэрства ў лясгасе практыкуюцца пастаянна. Раз у год лепшыя вальшчыкі лясніцтваў (сёлета на базе Кубліцкага ўдзельнічалі прадстаўнікі сямі лясніцтваў і лесапункта) канкурыруюць паміж сабой, каб лепшым з лепшых потым адстойваць гонар прадпрыемства на абласным узроўні. І хоць элементы праграмы – гэта іх звыклая штодзённая работа, аднак ад хвалявання ў канкурсантаў усё роўна дрыжэлі рукі.
Часовы мандраж і дрэннае надвор’е не перашкодзілі аднак Дзмітрыю Пашкевічу ўсяго за 16 секунд зрабіць мантаж ланцуга пілы. Наогул гэты рабочы будаўнічай брыгады лясгаса быў пераможцам літаральна ва ўсіх конкурсах: дакладней за ўсіх зрабіў раскрыжоўку, спрытней і хутчэй паваліў дрэва і абрэзаў сучча. У выніку Дзмітрый Мікалаевіч набраў 1329 ачкоў, тады як у работніка, заняўшага апошняе месца, іх усяго 325. Ён, а таксама вальшчык Ушацкага лясніцтва Міхаіл Віктаравіч Карабань (1156 ачкоў) і будуць удзельнічаць у абласных спаборніцтвах вальшчыкаў лесу. На трэцім месцы ляснік Сарочынскага лясніцтва Аляксандр Аляксеевіч Первянёнак (1014 ачкоў). Усе удзельнікі спаборніцтваў, канечне, былі заахвочаны кіраўніцтвам лясгаса.
Вольга КАРАЛЕНКА.
