Пазнавальныя казкі ўручылі першага верасня пяцікласнікам Ушацкай і Плінскай школ прадстаўнікі “Белаграпрамбанка”. Акцыя “Твае першыя фінансы”, дарэчы, будзе працягвацца ўвесь верасень і 88 тысяч беларускіх пяцікласнікаў (у іх ліку і 116 ушацкіх вучняў) стануць больш адукаванымі ў фінансавых пытаннях. Паколькі ў брашуры, якая сёлета дапоўнена шасцю новымі расказамі аб прыгодах Агрыка, у даступнай форме тлумачыцца, як, напрыклад, разлічыцца з дапамогай пластыкавай карткі за экскурсіі, аплаціць сувеніры. Кнігу школьнікі будуць чытаць самастойна, а вось з фінансавымі азамі вучняў супрацоўнікі банка знаёмяць падчас спецыяльных урокаў.
– Наша мэта, каб дзеці не толькі ўмелі карыстацца пластыкавымі карткамі, а і беражліва ставіліся да бацькоўскіх заробкаў, разумелі, што грошы проста так не атрымліваюць, а каб іх зарабляць – трэба перш за ўсё добра вучыцца, – гаворыць намеснік начальніка разліковакасавага цэнтра №37 у г.п.Ушачы “Белаграпрамбанка” Ірына Барысаўна Бурак.
Арганізатарам рэспубліканскай акцыі “Твае першыя фінансы” “Белаграпрамбанк” стаў невыпадкова. З 2007 года ў ім дзейнічае спецыяльная дзіцячая ашчадная праграма “Расці вялікі”, кліенты якой – дзеці атрымліваюць падарункі на дзень нараджэння, крэдытныя і дзіцячыя карты на спецыяльных умовах. Таксама вельмі зручны для бацькоў крэдыт “Студэнцкі”, ну а каб умець потым ім эканомна карыстацца, павышаць фінансавую адукацыю трэба са школы. А паколькі дзеці нават лепш за бацькоў асвойваюць розныя навінкі, то менавіта сённяшнія пяцікласнікі, прачытаўшы кнігу, могуць стаць дарадчыкамі па зручных фінансавых паслугах для сваіх бацькоў.
Вольга КАРАЛЕНКА.