У аўторак у музеі народнай славы імя У.Е.Лабанка звінелі дзіцячыя галасы. У гэты дзень піянерская дружына імя А.А.Клопава папоўнілася новымі членамі – упершыню піянерскія гальштукі павязаны 65 вучням чацвёртых класаў Ушацкай школы. Адметна, што праводзілася ўрачыстасць у Дзень абаронцаў Айчыны і менавіта ў музеі, што стала выдатным фіналам месячніка патрыятычных спраў, што праводзіўся ва ўстанове.
Гальштукі колеру дзяржаўнага сцяга Рэспублікі Беларусь новаспечаным піянерам павязалі намеснік дырэктара Ушацкай школы па выхаваўчай рабоце С.Д.Галай, а таксама старшыя піянеры. Святлана Дзмітрыеўна пажадала хлопчыкам і дзяўчынкам горда несці сцяг сваёй арганізацыі і высокае званне піянера, заўсёды быць першымі ў добрых справах.
Кацярына КАВАЛЕЎСКАЯ.
На здымку: С.Галай павязвае гальштук Ксеніі Крахотка.
