Якасць цеплаэнергіі, што выпрацоўваецца цэнтральнай кацельняй, размешчанай ва Ушачах па вуліцы Фрунзе, неаднаразова выклікала прэтэнзіі спажыўцоў падчас ацяпляльнага сезона. Кацельня, на якую ўскладзена цеплазабеспячэнне пасёлка, была ўведзена ў эксплуатацыю ў пачатку 80-х гадоў. Асноўным відам паліва для такіх цеплакрыніц з’яўляўся мазут, рэзервовым – прыродны газ.
У 2010 годзе з мэтай павелічэння долі мясцовых відаў паліва ў кацельні была праведзена рэканструкцыя, устаноўлены два катлы, прызначаныя для спальвання шчапы. Аднак час не стаіць на месцы: абсталяванне зношваецца, інфраструктура райцэнтра з кожным годам павялічваецца, будуюцца новыя шматкватэрныя жылыя дамы, адміністрацыйныя будынкі (пажарная частка, школа мастацтваў). У сувязі з гэтым устаноўленай магутнасці цеплазабеспячэння кацельні ў аб’ёме 11,35 МВт для ацяплення пасёлка стала недастаткова, бо спажываемая магутнасць складае зараз 12,45 МВт. Такім чынам, наспела пытанне аб павелічэнні магутнасці кацельні.
У 2019 годзе Беларускім навукова-даследчым праектным інстытутам энергетычнай прамысловасці была распрацавана схема цеплазабеспячэння Ушач, згодна з якой рэкамендавана ўстаноўка двух дадатковых шчапавых катлоў агульнай магутнасцю 3 МВт.
У 2020 годзе зроблена праектна-каштарысная дакументацыя рэканструкцыя, а сёлета выдзелены грашовыя сродкі на аб’ект у памеры 3,6 мільёна рублёў. У сакавіку праведзена працэдура закупкі па выбары кацельнага абсталявання. Зараз ажыццяўляецца выбар генеральнага падрадчыка.
Будаўніча-мантажныя работы плануецца пачаць адразу пасля завяршэння ацяпляльнага сезона. Працягласць будаўніцтва складзе 5 месяцаў. За гэты перыяд будуць устаноўлены два катлы з аўтаномным кіраваннем, транспарцёры для падачы шчапы, зманціраваны загрузачны бункер, адрамантаваны будынак кацельні, узведзены дадатковы навес для захоўвання паліва, выканана добраўпарадкаванне прылеглай тэрыторыі з асфальтаваннем пляцоўкі для выгрузкі шчапы. Здача аб’екта ў эксплуатацыю плануецца да пачатку ацяпляльнага сезона 2021-2022 гадоў.
Рэканструкцыя цэнтральнай кацельні павінна забяспечыць якаснае рэгуляванне падачы цеплаэнергіі на ацяпленне і гарачае водазабеспячэнне ў жылыя дамы, адміністрацыйныя і прылеглыя памяшканні ў зададзеных тэмпературных параметрах. Завяршальным этапам рэканструкцыі будзе правядзенне пусканаладачных работ, пасля чаго кацельня будзе гатова бесперабойна падаваць цяпло для патрэб гарадскога пасёлка.
А.СІДЗЮК, намеснік дырэктара УП ЖКГ Ушацкага раёна.
