На мінулым тыдні выпускны вечар прайшоў ва Ушацкай дзіцячай школе мастацтваў. Пасведчанні аб заканчэнні атрымалі ажно 42 навучэнцы, – гэта адна з самых вялікіх лічбаў у гісторыі музычнай альма-матар. Прычым 95 працэнтаў з іх – выдатнікі вучобы.
Хоць і аксакал на сцэне дырэктар школы Сяргей Васільевіч Парашкін, аднак усё роўна хваляваўся. Гэта першы выпуск у сценах новай школы і 47-ы наогул. Ён і прыгадваў той 1974 год, калі сам быў у ліку першых выпускнікоў. Менш урачыста праходзілі тады развітальныя мерапрыемствы, без відэапрэзентацый, аднак, канечне, з традыцыйным канцэртам, у якім галоўнымі выканаўцамі былі выпускнікі. Саліравалі эстраднікі Ягор Обух і Аліна Гурленя, Вераніка Гракава і Ксенія Крахотка – за фартэпіяна, Ульяна Хвошч – на цымбалах, Аляксей Броўка – на балалайцы, Паліна Шараева і Акім Дзямешка – на домры, Сяргей Арцем’еў на акардэоне. Улад Шыхель, Ягор Шасцярэнь, Дзмітрый Ільюшэнка і Іван Чумакоў былі ў складзе аркестра, а Аліна Заруба – ансамбля. Паліна Давыдава і Карына Кандрацкая кіравалі хорам, а Альбіна Марачкіна, Глеб Правада, Паліна Юркевіч і Жэня Талмачоў кружылі вальс бастон… На сцэну пад вершаваную візітоўку, якую для кожнага склала вядучая Галіна Уладзіміраўна Хвошч, выходзілі літаральна ўсе выпускнікі і іх выкладчыкі. Кожнаму ад імя бацькоў падзякавала Людміла Васільеўна Давыдава і прыгадала, як сем год таму Жанна Віктараўна Савіцкая пераканала аддаць дачку ў першы сацыяльны інстытут – так яна называе сваё харавое аддзяленне, дзе дзеці вучацца не толькі спяваць, але і чуць – адзін аднаго, а таксама фальш у танальнасці… і паводзінах. Таццяна Васільеўна Мураўская расказала, што ў сына Ягора быў перыяд, калі ён хацеў кінуць музыку, і таму вельмі рада, што зараз вырашыў зрабіць яе сваёй прафесіяй. Ён мяркуе паступаць на наступны год, ну а сёлета паспрабуюць стаць студэнтамі музычных вучылішчаў Герман Седзін, Віка Міхаль і Ульяна Хвошч. Заўсёды будуць мець прыгожую асанку выпускнікі Наталлі Веньямінаўны Корневай. І абавязкова спатрэбіцца пасведчанне аб заканчэнні мастацкага аддзялення выхаванцам Айгуль Аразалаўны Смык, якія абяруць модныя прафесіі дызайна і архітэктуры. Яго сёлета скончыла 8 выпускнікоў, па трынаццаць – у народным і харэаграфіі.
◆ Самы вялікі выпуск ва Ушацкай школе мастацтваў быў у 2015 годзе, калі яе закончылі 52 вучні.
Таму ледзь не плакала, апошні раз гледзячы на такі склад аркестра, Маргарыта Андрэеўна Грынберг: “Мне шкада з вамі развітвацца, вельмі шкада. Няхай ваша жыццё ідзе «на крэшчэнда», ну а без музыкі яно было б памылкай”. Сапраўды, як і без “музыкалкі”, якая, незалежна ад таго, станеш прафесійным музыкай ці не, назаўсёды застанецца домам, дзе цябе памятаюць і чакаюць. І ў пераробленай “пад сябе” фінальнай песні “Как здорово, что все мы здесь сегодня собрались” літаральна ўсе выпускнікі казалі дзякуй.
Вольга КАРАЛЕНКА.
