Усё часцей у зводкі дзяржаўтаінспектараў трапляюць кіроўцы мотаблокаў, а таксама сродкаў персанальнай мабільнасці, у прыватнасці, электрасамакатаў.
Праўда, агучаныя прэтэнзіі разумеюць не ўсе – у Правілах дарожнага руху, сапраўды, нямала нюансаў. Пра асноўныя, што датычацца адзначанай катэгорыі ўдзельнікаў дарожнага руху, мы папрасілі даступна расказаць супрацоўнікаў аддзялення ДАІ Ушацкага райаддзела міліцыі.
За мотаблок – з правамі?
Мотаблок – гэта механічны транспартны сродак, які не падлягае рэгістрацыі, а яго кіраванне не патрабуе ад чалавека спецыяльных правоў (катэгорыі). Ёсць вельмі важны аспект, заснаваны на нормах Кодэкса аб адміністрацыйных правапарушэннях Рэспублікі Беларусь, якія дзейнічаюць з 1 сакавіка 2021 года. З указанай даты за п’яную язду вадзіцелі пазбаўляюцца не вадзіцельскага пасведчання, як было дагэтуль (на мотаблоку пры гэтым можна было ездзіць), а права займацца дзейнасцю, звязанай з кіраваннем любых транспартных сродкаў. Такім чынам, калі “засвяціліся” нецвярозымі за рулём пасля 1 сакавіка 2021-га, за руль мотаблока вам нельга: парушыце арт. 18.14 КаАП – як за язду без правоў (штраф ад 5 да 20 базавых велічынь). Калі ж адбылося гэта раней ці ўвогуле ніколі не мелі вадзіцельскага пасведчання, можаце смела садзіцца за руль мотаблока. Варта ўдакладніць, што калясіць на ім можна толькі па гравійках ды палявых дарогах – выезд на ўдасканаленае пакрыццё, якім лічыцца асфальт, забаронены.
Не верце назве!
Усё большую папулярнасць ва ўшачан набываюць сродкі персанальнай мабільнасці. Ганяюць на іх, як кажуць, і старыя, і маладыя – пры гэтым вельмі многія так ці інакш парушаюць ПДД.
Далёка не ўсе падобныя сродкі сапраўды з’яўляюцца электрасамакатамі (указанай у дакументах назве верыць не варта!) – па тэхнічных характарыстыках яны могуць адносіцца да тыпу мапед, а значыць, патрабаваць наяўнасці ў вадзіцеля як мінімум катэгорыі АМ, правоў трактарыста-машыніста або самаходнай машыны. Давайце разбірацца. Калі гаворка ідзе пра сродак, ехаць на якім трэба стоячы, – гэта дакладна электрасамакат. У выпадку ж, калі кіраванне адбываецца седзячы, ёсць нюансы. Калі максімальная хуткасць – звыш 25 км/гадз., а магутнасць акумулятарнай батарэі – звыш 25 КВт, такі сродак адносіцца ўжо да тыпу мапед. Калі ў дакументах хуткасць не ўказана, дастаткова і двух астатніх агучаных пунктаў: пасадка (пры гэтым не важна, два колы ці тры) і магутнасць батарэі.
Варта нагадаць, што асобы, якія кіруюць электрасамакатамі, адносяцца да катэгорыі пешаходаў. А значыць, перамяшчацца яны могуць толькі па тратуарах і абочынах (не па праезнай частцы!), а ў цёмны час сутак павінны пазначаць сябе і сродак святлоадбівальнымі элементамі.
Кацярына КАВАЛЕЎСКАЯ.
