Гэтай зімой Дзядуля Мароз нячаста распісваў нашы вокны ледзянымі карункамі, затое выхаванцы Ушацкай дзіцячай школы мастацтваў імя Д.У.Крупені спраўна плялі ўзоры музычных сугучнасцяў на зімовых творчых спаборніцтвах.
У чарговы раз пацвердзіў свой высокі ўзровень балалаечнік Дзяніс Лаюшка – атрымаў дзве перамогі ў конкурсах “Крыштальная сняжынка” і “Зімнія мары”. Сёлета выхаванец Галіны Хвошч заканчвае навучанне ў ДШМ, але з любімым інструментам развітвацца не збіраецца: думае пра паступленне ў Наваполацкі музычны каледж.
А вось вучні Жанны Савіцкай накіраваліся ў гэту ўстанову на мінулым тыдні – і пакарылі журы вакальнага конкурсу “Гукі мары”. Дуэт Златы Коршун і Арыны Карэйшы пранікнёна выканаў песню “Маміны далоні” і стаў лаўрэатам І прэміі. Дапамагла дзяўчатам здабыць перамогу акампаніятар Людміла Сляцкая. Яркім быў і нумар ансамбля “Вясёлка”: вакалісты звярнуліся да беларускай класікі – прэзентавалі твор на верш Максіма Багдановіча “Слуцкія ткачыхі”. Лінію нацыянальнага каларыту дапоўнілі спецыяльна пашытыя аўтэнтычныя касцюмы, а таксама акампанемент цымбалаў Ірыны Коршун. У нашага гурта – лаўрэацкі дыплом ІІ ступені.
А вось рэгіянальны конкурс дзіцячай творчасці ў Браславе, на які наша ўстанова накіравала прадстаўнічы рознаўзроставы дэсант, меў цёплую назву “Да сонца!”. Яркім праменьчыкам бліснула самая малодшая ўдзельніца каманды – Аня Сляцкая: выхаванка педагога Святланы Валовай даказала, што ў другім класе ўжо можна выдатна выконваць фартэпіянныя творы Баха, і атрымала дыплом лаўрэата І ступені. Гэткай жа ўзнагароды ўдастоена і вучаніца І.Коршун Аня Бехава, якая віртуозна выканала на цымбалах разнапланавыя творы – пранікнёны раманс і іспанскі танец. Справіўся з хваляваннем юны дэбютант Ягор Барысёнак, які навучаецца ігры на балалайцы ў Генадзя Савіцкага – яго ўзровень журы ацаніла дыпломам лаўрэата ІІІ ступені. Дастойна прадставілі школу цымбалісты Косця Сіманаў (І.Коршун) і Ульяна Казьяніна (Н.Тарасенка). Дзяўчынка да таго ж нядаўна атрымала і дыплом лаўрэата ІІІ ступені конкурсу “Зімнія мары”.
Цікавым вопытам стала для дзяцей і паездка на абласную алімпіяду па тэорыі музыкі, якая праводзілася ў Віцебскім музычным каледжы імя І.Салярцінскага. Іван Праннік і Насця Пятроўская, якіх рыхтавалі В.Чумакова і В.Полазава, атрымалі граматы за актыўны ўдзел.
“Дасягненні юных музыкантаў – плён агульных намаганняў і, канечне, у нас нічога б не атрымалася без дапамогі бацькоў, – зазначае дырэктар ДШМ Наталля Іванова. – А ўдзельнічаць у конкурсах неабходна: мы можам ацаніць свой узровень у параўнанні з іншымі, зарыентавацца ў плане рэпертуару. Калі ж дзеці бачаць высокую ацэнку сваёй творчасці, гэта стымулюе іх да далейшай працы”.
Наталля БАГДАНОВІЧ.
