Шмат прыгожых сядзіб у Краснай Горцы Глыбачанскога сельсавета. Праязджаючы па доўгай вясковай вуліцы, ля гэтага невялікага доміка мы спыніліся невыпадкова: нават напрыканцы верасня яго падворак прываблівае стракатымі колерамі самых розных кветак, якія растуць і на клумбах, і ў вазонах. Сваімі ж любімымі гаспадыня сядзібы Тамара Міхайлаўна Мікалаева называе петуніі: гэтыя капрызныя прыгажуні патрабуюць асаблівага догляду, затое радуюць вока да восені.
Зараз Тамара Міхайлаўна, якая зімой жыве ў Наваполацку, здзіўляецца, што некалькі год таму мела намер прадаць дом, дзе прайшло яе дзяцінства, дзе жылі бацькі Вольга Якаўлеўна і Міхаіл Апанасавіч Аўсеевы – маці працавала ў жывёлагадоўлі, бацька быў брыгадзірам у паляводстве. Стараннасць і руплівасць перадалася ў спадчыну і дачцэ: яна трымае ў парадку і падворак, і прылеглую тэрыторыю, якую старанна ачышчае ад баршчэўніку. Маюць ахвоту да працы і яе дзеці, якія нядаўна пабудавалі на ўчастку вялікую драўляную альтанку, ну а зладжаныя побач арэлькі – гэта ўжо для ўнукаў. Уся сям’я вельмі любіць свой утульны дом у вёсцы, якая, у сваю чаргу, набывае другое жыццё ў тым ліку і дзякуючы такім вось руплівым людзям.
Наталля БАГДАНОВІЧ
