На мінулым тыдні ва Ушацкім РАУС прайшла аператыўная нарада, на якой падведзены вынікі службовай дзейнасці праваахоўнікаў за першае паўгоддзе. Пра галоўныя з іх мы папрасілі расказаць часова выконваючага абавязкі начальніка аддзела Аляксея Уладзіміравіча АНДРОСАВА:
– Сёлета праведзена шмат мерапрыемстваў, накіраваных на забеспячэнне грамадскага парадку, бяспекі грамадзян, іх законных інтарэсаў. Галоўным дасягненнем лічу недапушчэнне росту агульнай колькасці злачынстваў (65 супраць 66 мінулагодніх) і па лініі крымінальнага вышуку (42 супраць 48). Пры гэтым істотна павялічыўся працэнт раскрывальнасці па завершаных справах.
– Якія правапарушэнні найбольш распаўсюджаныя?
– Па-ранейшаму ў зімовы перыяд пераважаюць крадзяжы з дач, а ў летні пад увагу зламыснікаў часта трапляюць веласіпеды.
– Як часта ў раёне праводзяцца мерапрыемствы, накіраваныя на барацьбу з зялёным змеем?
– Гэта пытанне мы кантралюем пастаянна, супрацоўнікаў РАУС хвалюе праблема п’янства і алкагалізму сярод ушачан. Праводзім прафілактычныя гутаркі на прадпрыемствах і ў арганізацыях. З пачатку года да адміністрацыйнай адказнасці за незаконны абарот алкагольнай прадукцыі прыцягнуты 25 грамадзян, канфіскавана 98,2 літра самагону, брагі і іншых моцных напояў, у лячэбна-працоўныя прафілакторыі накіравана 10 чалавек.
– Наколькі востра стаіць пытанне злачынстваў, учыненых непаўналетнімі?
– Сёлета такіх, на шчасце, не было (за аналагічны перыяд 2016 года – 6). Істотна зменшылася і колькасць злачынстваў, учыненых групай асоб (5 супраць 10 мінулагодніх). Не дапушчана фактаў згвалтавання, вымагальніцтва, махлярства, разбояў, крадзяжоў аўтатранспарту.
– Але ж не бывае, калі ўсё бязвоблачна…
– Так. Сёлета павялічылася колькасць злачынстваў, здзейсненых асобамі з судзімасцю (10 супраць 8 у 2016-м), у стане алкагольнага ап’янення (12 супраць 6). У сферы эканомікі выяўлена 7 злачынстваў (было 6), у сферы наркакантролю і супрацьдзеяння гандлю людзьмі – 3 (1).
– А якая сітуацыя на дарогах раёна?
– За гэты перыяд адбылося тры аварыі, адна з якіх – па віне нецвярозага вадзіцеля. У выніку 10 чалавек атрымалі траўмы, трое загінулі. Усяго за 6 месяцаў бягучага года супрацоўнікі дзяржаўтаінспекцыі выявілі 1969 правапарушэнняў, сярод іх 27 выпадкаў кіравання аўтамабілем у стане алкагольнага ап’янення, 320 перавышэнняў хуткаснага рэжыму. Па-ранейшаму “вольна”, на жаль, адчуваюць сябе на дарозе пешаходы – за адзначаны перыяд на іх складзены 351 пратакол. За выпуск тэхнічна няспраўных транспартных сродкаў да адказнасці прыцягнуты 19 службовых асоб, яшчэ 6 – за допуск да кіравання транспартам вадзіцеляў, якія знаходзіліся ў стане ап’янення ці не мелі права кіравання, 3 – за парушэнне ўтрымання вуліц і дарог.
– Якія задачы ставяцца перад райаддзелам на перспектыву?
– Работа з насельніцтвам па вырашэнні праблемных пытанняў, раскрыццё злачынстваў, забеспячэнне грамадскага парадку і бяспекі дарожнага руху. Будзем імкнуцца не толькі да ўтрымання заваяваных штодзённай карпатлівай працай пазіцый, але і ўмацоўваць іх.
Падрыхтавала К.КАВАЛЕЎСКАЯ.