За ўсю гісторыю правядзення чэмпіянатаў упраўлення ўнутраных спраў Віцебскага аблвыканкама па самаабароне ўшацкія праваахоўнікі яшчэ не мелі такога высокага выніку – участковы інспектар інспекцыі па справах непаўналетніх Дзмітрый Гардзіёнак і оперупаўнаважаны аддзялення крымінальнага вышуку Станіслаў Коршун, якія прадстаўлялі аддзел на спаборніцтвах, занялі не толькі лідарскія пазіцыі ў асабістым першынстве, але і заваявалі першае агульнакаманднае месца сярод 21 каманды-ўдзельніцы!
Захапленне спортам у Дзмітрыя яшчэ са школьнай пары. У 2013 годзе ён скончыў Беларускі дзяржуніверсітэт фізічнай культуры, з’яўляецца кандыдатам у майстры спорту па дзюдо, пазаштатным інструктарам па фізічнай падрыхтоўцы ў РАУС. Малады чалавек рэгулярна наведвае трэнажорную залу, трымае сябе ў добрай фізічнай форме. Для перамогі, лічыць, патрэбны правільны настрой, асаблівая сабранасць, каб своечасова заўважыць памылкі саперніка, адзначыць яго слабыя і моцныя бакі, а выходзячы на паядынак, неабходна цалкам засяродзіцца на ім, выкласціся на ўсе сто працэнтаў. Такі ж падыход Д.Гардзіёнак прымяняе і ў службе, дзе хапае сітуацый, што патрабуюць сілы волі, умення працаваць над сабой.
Станіслаў сур’езна заняўся адзінаборствамі падчас вучобы ў Магілёўскім інстытуце Міністэрства ўнутраных спраў, прадоўжыў заняткі і калі прыйшоў сёлета на службу ва Ушацкі РАУС. Імкнецца рэгулярна рабіць зарадку, з задавальненнем бегае, займаецца на турніку. На прапанову прыняць удзел у чэмпіянаце па самаабароне пагадзіўся адразу: хацеў ацаніць узровень сваёй падрыхтоўкі ў сапраўдных “баявых” умовах. Прызнаецца, што не разлічваў трапіць у лік пераможцаў на такіх спаборніцтвах, і сціпла падкрэслівае, што ў спорце немалаважную ролю адыгрывае ўдача.
Але ж маладыя ўшацкія чэмпіёны ярка прадэманстравалі свае валявыя навыкі і ўменні, і можна не сумнявацца, што ў выпадку неабходнасці яны прыменяць іх і падчас нясення службы.
Самаабарона без зброі – службова-прыкладны від спорту, і валодаюць ім на належным узроўні ўсе супрацоўнікі Ушацкага РАУС – на апошніх выніковых занятках па фізічнай падрыхтоўцы, праведзеных пры ўдзеле камандавання ўпраўлення ўнутраных спраў аблвыканкама, аддзелу выстаўлена агульная адзнака “выдатна”.
Кацярына КАВАЛЕЎСКАЯ.
