Скоро сезон массового отдыха. В какие санатории на отдых и лечение могут поехать ушачане и какие льготы имеют

Здравоохранение

Хутка сезон масавых адпачынкаў. Адны рэзервуюць атэль на ўзмор’і, другія па-ранейшаму аддаюць перавагу беларускім здраўніцам. І наша гутарка з вядучым спецыялістам прадстаўніцтва Віцебскага абласнога ўпраўлення Рэспубліканскага цэнтра па аздараўленні і санаторна-курортным лячэнні насельніцтва па Ушацкім раёне Наталляй Васільеўнай ВАЙЦЯХОЎСКАЙ прысвячалася тым зменам, якія чакаюць уладальнікаў пуцёвак.

– Наталля Васільеўна, наколькі запатрабаваны пуцёўкі ў беларускія санаторыі?

– Запыт перавышае прапанову. Як правіла задавальняецца працэнтаў 60 заявак, якія я падаю. Колькасць пуцёвак залежыць ад насельніцтва раёна. Летась 24 ушачаніна атрымалі пуцёўкі праз рэспубліканскі цэнтр аздараўлення. На чарзе знаходзіцца каля 200 пенсіянераў і інвалідаў.

Яны маюць права на льготныя пуцёўкі раз у два гады?

– Інваліды Вялікай Айчыннай вайны і прыраўнаваныя да іх асобы маюць першачарговае права. Прычым ім бясплатная пуцёўка выдзяляецца штогод, калі не карыстаюцца – атрымліваюць кампенсацыю. Інваліды І і ІІ груп забяспечваюцца бясплатнымі пуцёўкамі ў першую чаргу, а ветэраны працы – па агульнай чарзе, яны маюць права на льготную пуцёўку не часцей аднаго разу ў два гады. Аплата залежыць ад памеру пенсіі і складае як правіла 15-20 працэнтаў ад кошту пуцёўкі. Хачу сказаць, што хоць на чарзе многа людзей, за два гады ці крыху больш усе яны маюць рэальную магчымасць трапіць у здраўніцу.

– Аднак Вы казалі, што не ўсе заяўкі задавальняюцца.

– Справа ў тым, што многія нашы жыхары падаюць заяўкі на канкрэтныя санаторыі. Пераважная большасць не жадае далёка ехаць, таму і карыстаюцца найбольшай папулярнасцю “Лясныя азёры”, “Лепельскі ваенны”, “Лётцы”. Нехта хацеў бы пабываць менавіта ў “Радоне” ці спецыялізаваных санаторыях за мяжой. А, напрыклад, у нашу здраўніцу на другі квартал прыйшла толькі адна пуцёўка. Таксама не заўсёды супадае час пуцёвак і магчымасць людзей, тады чарга перасоўваецца. Ёсць ушачане, якія неаднаразова адмаўляюцца ад аздараўлення, але на чарзе тым не менш застаюцца. Прасцей за ўсё трапіць у санаторый па пуцёўцы членам працоўных калектываў.

– Ці ёсць нейкія змены для ўладальнікаў пуцёвак?

– Так, яны датычацца аплаты курортнага збору. Раней аплачвалася ад двух да пяці працэнтаў (памер курортнага збору ў здраўніцах розны) ад поўнага кошту пуцёўкі. Зараз толькі ад сумы, якую аплачвае адпачываючы. Паколькі курортны збор уносіцца непасрэдна ў здраўніцы, неабходна ўзяць копію аплаты.

А калі на прадпрыемстве аказваецца дапамога (па калектыўным дагаворы ці прафсаюзная) на частковы або поўны кошт пуцёўкі?

– Не, гэтыя віды дапамог не ўлічваюцца. Для аплаты курортнага збору пойдзе аплачаная сума, якая залежыць ад памеру заробку, незалежна ад таго, уносіў яе член калектыву, прафкам або прадпрыемства.

Нагадайце, калі ласка, пра льготы, якія маюць патэнцыйныя адпачываючыя.

– Думаю, усе ведаюць, што бясплатна выдаюцца ўсе дзіцячыя пуцёўкі і толькі 15 працэнтаў аплачвае той з дарослых, хто суправаджае. Больш таго, адзін з бацькоў, які едзе з дзіцем-інвалідам, можа нават узяць бальнічны ліст (аплачваемы) на час знаходжання ў санаторыі з сынам або дачкой, калі няма іншай магчымасці пакінуць работу. Бясплатна знаходзяцца ў здраўніцах асобы, якія суправаджаюць інвалідаў І групы. Для членаў Федэрацыі прафсаюзаў Беларусі, калі яны набываюць пуцёўку самастойна, існуе скідка ў памеры 25 працэнтаў у санаторыі, якія належаць да “Белпрафсаюзкурорта”. Першапачаткова такія “бонусы” беларусы мелі толькі на час адпачынку ў зімовыя, менш запатрабаваныя месяцы, а зараз – у любы час. Акрамя таго шмат акцый праводзяць непасрэдна самі здраўніцы.

Хацелася б даведацца пра геаграфію санаторыяў, на якія прыходзяць пуцёўкі. Ці рэальна атрымаць іх у курорты, што знаходзяцца за мяжой, на моры?

– Зусім нядаўна выдавала пуцёўку ў Місхор у санаторый маці і дзіцяці. Часта ездзяць ушачане ў “Друскінінкай”, на гэты квартал быў дэфіцытны “Радон”. Пуцёўкі прыходзяць у здраўніцы па ўсёй краіне, ёсць беларускія санаторыі ў Юрмале, Сочы, Туапсе. На другі квартал быў вялікі выбар для дзяцей: “Расінка”, “Случ”, “Свіслач”, “Чабарок”, “Сосны”, “Надзея”. І проста не разумею бацькоў, якія адмаўляюцца на льготных умовах, практычна неадчувальна для бюджэту сям’і аздараўліваць дзяцей.

Гутарыла Вольга Караленка.



Добавить комментарий

Ваш e-mail не будет опубликован. Обязательные поля помечены *