Складана прыгадаць больш дэмакратычную гульню, чым дартс. Дакладна кідаць дроцікі ў мішэнь могуць нават дзеці і пажылыя людзі, для гэтага неабавязкова мець атлетычную фігуру ці надзвычайны ўзровень IQ. Турнір па дартсе можна арганізаваць нават на сяброўскім пікніку, ушачане ж пастаянна ўключаюць яго ў праграму раённай спартакіяды працоўных калектываў. А каб лепшыя снайперы мелі магчымасць паспрачацца ў трапнасці не толькі раз у год, раённы фізкультурна-спартыўны клуб арганізаваў асобныя спаборніцтвы па гэтым відзе.
Мішэнь у дартсе павінна вісець на вышыні 1.73 метра ад зямлі, а ігрок кідае дроцікі з адлегласці 2,37. У гэтай гульні каля 20 разнавіднасцяў, удзельнікі турніру спаборнічалі ў “Вялікім раўндзе”. Ігракі па чарзе кідалі па тры дроцікі ў сектары мішэні, пачынаючы з першага (у ім за кожнае трапленне налічваўся бал) і заканчваючы дваццатым, дзе кожны поспех каштаваў 20 балаў). Трапленне ў зоны падваення ці патраення сектара давала адпаведны ачковы бонус, а завяршаўся круг кідкамі ў “яблычак” (цэнтр мішэні), што прыносіла 25 ці 50 ачкоў. З першых сектараў лідарства захапіў прызнаны мэтр гульні Ігар Шышко, але сапернікі не давалі яму пайсці ў адрыў. Як і ў нядаўнім чэмпіянаце па настольным тэнісе, быў зараджаны на самы высокі вынік Віктар Леўшык. “Карыстаючыся выпадкам, хачу падзякаваць прафоргу ясляў-сада №2 Таццяне Васілеўскай, якая прапанавала мне паўдзельнічаць у турніры – хоць праводзіцца ён у асабістым заліку, але і спартыўны гонар сваіх арганізацый мы, канечне, пры гэтым адстойвалі”. Роўна правёў спаборніцтвы былы футбаліст-прафесіянал Андрэй Лодзіс, даказаўшы, што трапнасць уласціва яму не толькі ва ўдарах па мячы, а і ў дзеяннях рук.
У выніку “золата” з сумай 370 ачкоў заваяваў І.Шышко, да апошняга сектара меў шансы на перамогу В.Леўшык, але адстаў на 39 балаў, “бронза” дасталася Андрэю. Добрыя шансы на прызы меў сямейны дуэт Рамана і Мікалая Фядосенкаў, аднак на серыях кідкоў у самых “дарагіх” сектарах ім крыху не хапіла вязення. “Значыць, трэба трэніравацца яшчэ больш!” – зазначыў Мікалай Леанідавіч і дадаў, што атрымаў у гэты дзень вялікую порцыю адрэналіну, за што, прынамсі, і любіць спорт. Турнір сапраўды аказаўся відовішчным: сярод сапернікаў не было тых, хто спадзяваўся толькі на ўдачу, бо, як прызналіся дартсісты, у кожнага з іх дома вісіць мішэнь і маецца прафесійны набор дроцікаў. Але думаецца, што вельмі многім ушачанам па сілах парушыць гегемонію гэтай “касты”, так што будзем чакаць наступных гарачых баталій.
Наталля БАГДАНОВІЧ.