Нядаўна мы знаёмілі чытачоў з умовамі набыцця, пакупкі зямельных участкаў ва ўласнасць пад будаўніцтва жылых дамоў. Сёння ж крыху падрабязней спынімся на тым, што трэба рабіць гаспадару, каб набыць у прыватную ўласнасць зямельныя ўчасткі, якія ўжо абслугоўваюцца грамадзянамі. Наогул, вялікая колькасць пабудоў на вёсцы застаецца незарэгістраванай, як і ўчасткі, на якіх яны знаходзяцца. І прыгадаць пра парадак дзеяння грамадзян мы папрасілі начальніка землеўпарадкавальнай службы райвыканкама Анатоля Аляксандравіча КРАСЬКО.
– Па-першае, гаспадары павінны падаць заяву ў сельвыканкам, на тэрыторыі якога знаходзіцца зямельны ўчастак, аб выдачы яму дакумента на права валодання гэтым участкам. Потым спецыялістамі робіцца замер межаў участка. Тут ёсць асаблівасці. Для тых гаспадароў, а таксама спадчыннікаў, у каго даныя аб участку занесены ў пагаспадарчую кнігу сельскага выканаўчага камітэта да 1 студзеня 1999 года, абмер робіцца бясплатна. Такая льгота прадугледжана Указам №667 Прэзідэнта Рэспублікі Беларусь яшчэ ад 27 снежня 2007 года, які і быў падпісаны, каб даць паслабленне жыхарам сельскай мясцовасці. Для тых, у каго дамы пабудаваны пазней 1 студзеня 1999 года, давядзецца заплаціць за паслугі арганізацыі па землеўпарадкаванні прыкладна 180 тысяч рублёў.
Далей вызначаецца кошт участка ў залежнасці ад плошчы і кадастравай цаны па канкрэтным населеным пункце. Кадастравая цана хоць і паднялася, аднак па-ранейшаму застаецца невялікай – у сельскіх населеных пунктах пераважна 18 цэнтаў за метр квадратны. Такім чынам участак памерам 25 сотак будзе каштаваць гаспадару 450 долараў. Не памянялася цана пакуль што ў садаводчым кааператыве “Дружба”, і хоць месца там маляўнічае, на беразе вадаёмаў, кошт па-ранейшаму 1 цэнт за метр квадратны.
І апошні крок – рэгістрацыя зямельнага ўчастка. Гэта працэдура платная для ўсіх, каштуе прыкладна 70 тысяч рублёў.
Абагульняючы сказанае, хачу дадаць, што рэгістраваць зямельны ўчастак трэба ў любым выпадку, незалежна ад таго, у пажыццёвае карыстанне ці ў прыватную ўласнасць вы яго афармляеце. Ну а паколькі ў многіх сельскіх населеных пунктах Ушаччыны менавіта ўчасткі карыстаюцца павышаным попытам, бо знаходзяцца на беразе вадаёмаў, то вашы грошы лёгка акупяцца пры далейшым продажы.
