В 2014 году на Ушаччине родилось 112 малышей

З 2004 года ў Беларусі назіраецца рост нараджальнасці ва ўсіх рэгіёнах, павялічваецца доля другіх і трэціх дзяцей у агульнай колькасці народжаных. Адносна стабільным з’яўляецца гэты паказчык і на Ушаччыне. Пра дэмаграфічную сітуацыю ў раёне ў 2014 годзе расказвае начальнік аддзела загса Ушацкага райвыканкама А.М.МАЛАШЧАНКА:Летась у раёне зарэгістравана 112 нараджэнняў. І хоць гэта менш, чым у 2013-м, аднак можна вылучыць і станоўчую тэндэнцыю, бо мінус да мінулагодняй нараджальнасці амаль удвая меншы, чым быў гады тры-чатыры таму. У 2014-м на Ушаччыне з’явіліся на свет 59 хлопчыкаў і 53 дзяўчынкі, 48 з якіх былі першынцамі, 43 — другімі дзецьмі ў сям’і, 17 — трэцімі, 3 — чацвёртымі, 1 — пятым.

Летась найбольшая колькасць дзяцей — 85 — з’явілася ў мам ва ўзросце ад 18 да 30 гадоў, 24 — ад 31 да 40, 1 — больш 40. Самыя маладыя матулі нарадзілі ва ўзросце 15 і 17 гадоў. Самымі маладымі бацькамі сталі двое 19-гадовых хлопцаў, а самым сталым — 47-гадовы мужчына. Прыемна, што большасць «кветачак жыцця» з’явілася на свет у поўных сем’ях. А вось 12,5 працэнта немаўлят будуць выхоўваць толькі мамы.

Самымі папулярнымі імёнамі сярод хлопчыкаў сталі Арцём, Уладзіслаў, Ілья, Ягор, Кірыл, Максім, а сярод дзяўчынак — Аляксандра, Дар’я, Лізавета, Мілана, Ульяна, Яна. Цікава, што зараз у разрад рэдкіх перайшлі некалі вельмі папулярныя і распаўсюджаныя імёны: Юрый, Пётр, Павел, Мікалай, Іван, Антон, Таццяна, Кацярына, Вера, Ніна, Алена і некаторыя іншыя.

Што датычыцца колькасці шлюбаў, то яна зменшылася ў параўнанні з 2013-м на 24 і дасягнула 110. 32 мужчыны і 26 жанчын узялі шлюб паўторна. Сярэдні ўзрост тых, каго з’ядналі вузы Гіменэя, склаў 29 гадоў у мужчын (на ўзроўні папярэдняга года) і 27 у жанчын (на 1 год больш, чым у 2013-м). Самымі маладымі жаніхом і нявестай сталі хлопец і дзяўчына, якім споўнілася 18, а самыя старэйшыя размянялі ўжо сёмы дзясятак.

Асобным радком можна вылучыць зарэгістраваныя шлюбы з замежнымі грамадзянамі. Такіх летась было 9. Вырашылі парадніцца з жыхарамі Ушаччыны грамадзяне Расійскай Федэрацыі, Украіны і Літоўскай Рэспублікі.

У апошні час назіраецца змяншэнне колькасці зарэгістраваных смерцяў у нашым раёне. Калі ў 2010 годзе іх было 392, у 2011-м — 365, 2012-м — 342, 2013-м — 346, то ў 2014-м — толькі 332. І ўсё ж нагоды для аптымізму мала: як паказваюць даныя, многія прадстаўнікі моцнай паловы не дажываюць нават да 50-ці. Так, летась не стала 2 мужчын ва ўзросце да 30 гадоў (рэгістрацыі смерцяў жанчын у гэтым узросце не было), 20 — ад 31 да 50 (жанчын утрая менш). Амаль настолькі ж колькасць памерлых мужчын ва ўзросце ад 51 да 70 гадоў перавышае адпаведны жаночы паказчык.

На жаль, як і раней, смяротнасць у нашым раёне перавышае нараджальнасць. Будзем спадзявацца, што ў наступіўшым годзе сітуацыя зменіцца да лепшага.

Адзначу, што прыведзеныя лічбы датычацца вынікаў работы органаў дзяржаўнай рэгістрацыі актаў грамадзянскага стану Ушацкага раёна і могуць не супадаць з данымі статыстыкі.

Падрыхтавала К.КАВАЛЕЎСКАЯ.