Не была сёлетняя зіма лютай, не пужала нас сцюжай ды завеямі, але ж надакучыць усё роўна паспела, а таму з задавальненнем прыйшлі ў нядзелю ўшачане на цэнтральную плошчу раёна, каб гукацьсустракаць прыгажунювясну. І хоць не прыспеў яшчэ час хаваць у шафы зімнія паліто, але ўсё часцей радуе вока сонейка, а як прыкметна падаўжэў дзень! Вось і масленічная раніца выдалася чыстай прамяністай, паклікала народ весяліцца задорнымі гукамі спеваў ды спакуслівым пахам пачастункаў.
А колькі розных забаў ды відовішчаў было на плошчы! Цікавай праграмай парадавалі культработнікі: знайшлося ў ёй месца традыцыйным абрадавым спевам і танцам, вясёлым сцэнкам і прыпеўкам. Дзецям і дарослым было прапанавана больш дзясятка конкурсаў: можна было, напрыклад, прайсціся на хадулях, праверыць трапнасць у стральбе і спрыт у баі мяхамі на бервяне. Адмысловы тавар выклалі на свае латкі карабейнікі, а цыганкаваражбітка адкрывала кліентам праўду аб тым, ці чакае іх дарога дальняя і казённы дом. Госці ледзь паспявалі пераходзіць у розныя канцы плошчы, каб не прапусціць нічога цікавага. Тым больш што многія спецыяльна прыбылі на свята з дальніх куточкаў раёна. Так, з Касароў прыехаў Павел Аляксандравіч Алексяёнак з дачкой Рытай і яе сяброўкай Светай Харашкевіч. Дзяўчаткі, дарэчы, апранулі на свята прыгожыя народныя хусткі і выглядалі надзвычай ярка і жыццярадасна. Завітаў на Масленіцу з Селішча кіраўнік мясцовага сельгаспрадпрыемства Віктар Васільевіч Кажан. Для яго і іншых аграрыяў гэта свята асаблівае, бо дае старт апошняму этапу падрыхтоўкі да новага цыклу сельгасработ, пачынае перыяд года, калі пра выхадныя давядзецца забыцца.
Ну а якая ж Масленіца без пачастункаў? Ад выстаўленых паўсюдна страў літаральна разбягаліся вочы. Флагман кулінарнага майстэрства – народны клуб “Прысмакі” – частаваў гасцей галоўным атрыбутам Масленіцы – самымі разнастайнымі блінамі з дымком. Канкурэнцыю прызнаным кулінарамаматарам складалі прафесіяналы з райспажыўтаварыства і дружныя каманды вясковых гаспадынь з панадворкаў, якія прэзентавалі сельсаветы. Тут можна было паласавацца блінамі, пірагамі, рулетамі, запяканкамі і нават гарачымі дранікамі і клёцкамі, а яшчэ і вызнаць сакрэты іх прыгатавання. Напрыклад, на маё пытанне, чаму так хутка пусцее вялікі чыгунок з яе клёцкамі, Тамара Антонаўна Каваленка патлумачыла: “Начынку для душ здрабняю не мясарубкай, а нажом, каб кавалачкі мяса і сала былі больш сочнымі, і абавязкова дадаю кмін”. Свае фірменныя стравы прапаноўвалі паспытаць і яе суседкі з Матырына Галіна Сцяпанаўна Шайтар, Раіса Уладзіміраўна Шалонька, Зінаіда Аляксееўна Шнітко. Увогуле літаральна ўсе панадворкі парадавалі гасцей арыгінальнымі стравамі, прэзентавалі свае кулінарныя “разынкі”.
Знайшлося што паказаць і нетрадыцыйным удзельнікам Масленіцы – ушацкім выратавальнікам. Асаблівую цікаваць да іх шоу праявілі дзеці, якім у гэты дзень было дазволена на толькі прымераць “баявую” экіпіроўку, але і пасядзець у кабіне сапраўднай пажарнай машыны. А яшчэ высветлілася, што выратавальнікі здольныя на сапраўднае чараўніцтва, бо могуць кіраваць прыроднымі з’явамі – напрыклад, запаліць у небе вясёлку! Зрабілі яны гэта, пусціўшы ў паветра магутны струмень вады.
Ну а скончылася свята дзействам больш традыцыйным – спальваннем на вогнішчы чучала зімы. “Ну вось, нарэшце!” – пракаментаваў убачанае ўшацкі першакласнік Мікіта Клім. І, напэўна, агучыў думку практычна ўсіх людзей, што адзначалі разам гэтае жыццесцвярджальнае народнае свята.
Наталля БАГДАНОВІЧ.