Штогод напярэдадні канікул перад многімі бацькамі ўзнікае пытанне: куды ўстроіць на лета сваё дзіця. Не пакідаць жа на волю лёсу дома, перажываючы потым, чым яно занята ў вольны час… Добры варыянт у такім разе – запісаць школьніка ў аздараўленчы лагер, у якім ён не толькі будзе пад наглядам старэйшых, але яшчэ і паправіць здароўе.
Гэтым летам аддзел адукацыі, спорту і турызму Ушацкага райвыканкама плануе арганізаваць работу чатырох лагераў з кругласутачным прабываннем школьнікаў. Як нам расказала метадыст вучэбна-метадычнага кабінета А.М.Жук, ужо напачатку чэрвеня гасцінна адчыніць дзверы перад хлопчыкамі і дзяўчынкамі стацыянарны аздараўленчы лагер “Турасполле”. Ён традыцыйна будзе працаваць у тры змены, кожная працягласцю 18 дзён. Першая змена стартуе 9 чэрвеня, другая – 28 чэрвеня, трэцяя – 17 ліпеня. Зараз лагер актыўна рыхтуецца да адкрыцця. Штогод у ім паляпшаюцца ўмовы для аздараўлення і актыўнага адпачынку дзяцей. Сёлета, напрыклад, арганізавана ацяпленне спальнага корпусу, дзе таксама абсталяваны туалет, падведзена каналізацыя да вулічных “санітарных пакояў”. Поўны кошт пуцёўкі ў названым аздараўленчым лагеры складзе 2 мільёны 970 тысяч рублёў, бацькоўская даплата – 1 мільён 570 тысяч. Акрамя гэтага на базе “Турасполля” 17 ліпеня адкрыецца кругласутачны палатачны лагер. Парадуе дзяцей таксама турыстычны лагер на базе Кубліцкай школы (пачатак работы – 23 чэрвеня), а таксама лагер працы і адпачынку на базе Ільюшынскай (ліпень), дзе хлопчыкі і дзяўчынкі будуць занятыя на зборы ягад для ААТ “Ільюшынскі”.
Летам ва ўсіх установах адукацыі раёна будуць працаваць таксама дзённыя лагеры. А ў Вялікадолецкай, Вяркудскай, Арэхаўскай і Ушацкай школах дадаткова адкрыюцца лагеры працы і адпачынку.
Па пытаннях набыцця пуцёвак і рашэння іншых пытанняў, звязаных з аздараўленнем дзяцей, можна звяртацца ў аддзел адукацыі, спорту і турызму райвыканкама, кабінет 73 да метадыста Алены Мечыславаўны Жук (рабочы тэлефон 2-74-92).
* * *
Бяспечныя канікулы абяцаюць і праваахоўнікі. З мэтай папярэджання безнагляднасці і правапарушэнняў непаўналетніх, арганізацыі вольнага часу дзяцей і забеспячэння кантролю за іх паводзінамі ў перыяд з 1 мая па 1 кастрычніка дзейнічае міжведамасная спецыяльная праграма “Клопат”.
Энергію маладосці супрацоўнікі інспекцыі па справах непаўналетніх райаддзела міліцыі прапануюць накіраваць у грамадска-карыснае рэчышча. Запланавана правядзенне розных спартыўных і грамадзянска-патрыятычных мерапрыемстваў. “Педагогі ў пагонах” будуць частымі гасцямі ва ўсіх месцах масавага адпачынку непаўналетніх.
Актуальнасць праводзімых мерапрыемстваў абумоўлена тым, што за чатыры месяцы 2015 года падлеткамі Ушаччыны здзейснена 1 злачынства і 11 адміністрацыйных правапарушэнняў, за невыкананне абавязкаў па выхаванні дзяцей пакарана 3 бацькоў, за прыцягненне непаўналетніх да супрацьпраўных паводзін – 11 грамадзян, за рэалізацыю непаўналетняму спіртных напояў – 1 работнік гандлю. Зараз на прафілактычным уліку ў інспекцыі знаходзяцца 15 юнакоў і дзяўчат.
– У перыяд канікул у першую чаргу будзе забяспечана занятасць навучэнцаў з малазабяспечаных і мнагадзетных сямей, тых, хто знаходзіцца ў сацыяльна небяспечным становішчы або на прафілактычным уліку, – аб прыярытэтных накірунках “Клопату” расказвае старшы інспектар ІСН РАУС Канстанцін Васільевіч Аўсіевіч, дадаючы, што толькі ад саміх падлеткаў залежыць, чым запомніцца ім гэтае лета…
Кацярына КАВАЛЕЎСКАЯ.