Асабліва багата Ушаччына на водныя рэсурсы, ахове якіх раённая экалагічная інспекцыя надае пастаянную ўвагу. Прыемна канстатаваць, што рэканструкцыя ачышчальных збудаванняў гарпасёлка зняла вострую праблему забруджання ракі Ушача: ніводная з проб вады, якія рэгулярна накіроўваюцца ў Наваполацкую лабараторыю аналітычнага кантролю, не паказала перавышэння нарміраваных значэнняў шкодных рэчываў. Пад пастаянным кантролем інспекцыі знаходзяцца ўсе размешчаныя ў водаахоўных зонах жывёлагадоўчыя аб’екты, якія з’яўляюцца патэнцыяльнымі крыніцамі забруджвання вадаёмаў.
Важным экалагічным накірункам з’яўляецца захаванне чысціні паветра, таму ў раёне пастаянна робяцца замеры выкідаў кацельняў – тут таксама перавышэння норм зафіксавана не было.
Сёлета і ў нашым рэгіёне, і ў краіне, як ніколі вялікая ўвага надаецца пытанню навядзення парадку на зямлі і добраўпарадкаванню населеных пунктаў, і вынікі гэтай работы нельга не заўважыць. У раёне створаны штаб, у склад якога ўвайшлі прадстаўнікі ўсіх зацікаўленых службаў, у тым ліку і экалагічнай. Толькі з пачатку бягучага года работнікі інспекцыі правялі 244 абследаванні самых розных аб’ектаў – вытворчых і прыдамавых тэрыторый, дарог, мініпалігонаў, кар’ераў і іншых – падчас якіх было выяўлена 109 парушэнняў, выдадзена 49 прадпісанняў і рэкамендацый, складзена адміністрацыйных пратаколаў на агульную суму больш 13 мільёнаў рублёў.
Паранейшаму вострай праблемай застаецца ўтрыманне сельскіх мініпалігонаў для захавання бытавых адходаў. І хоць УП ЖКГ робіць многае ў гэтым напрамку, аднак зза нястачы тэхнікі і фінансавання не заўсёды своечасова праводзяцца работы па захаванні смецця, а гэта не толькі псуе выгляд і стан аб’екта, але і стварае небяспеку ўзгарання адходаў. І такія факты, на жаль, сёлета меліся: адбыліся пажары на мініпалігонах у Сарочыне і ДворПліне, у выніку чаго ў атмасферу трапілі таксічныя рэчывы, якія ўтвараюцца пры згаранні пластыку і іншых сінтэтычных матэрыялаў.
Навядзенню парадку на зямлі ў нашым раёне моцна перашкаджае распаўсюджанне баршчэўніку Сасноўскага. У канцы красавікапачатку мая наша інспекцыя праводзіла маніторынг месцаў яго росту, па выніках якога ў адрас землекарыстальнікаў было накіравана 16 рэкамендацый. Для барацьбы з раслінай хімічным спосабам ва Ушацкім ПМС створана спецыяльная брыгада, па меры магчымасці вядзецца гэтая работа і ў сельсаветах. На цяперашні момант каля 100 гектараў плошчаў раёна вызвалена ад зараснікаў баршчэўніку, з іх 77 апрацавана радыкальным хімічным спосабам.
З пачаткам сезона адпачынку асаблівую актуальнасць набывае кантроль за выкананнем арандатарамі вадаёмаў сваіх абавязкаў. А недахопаў у гэтым пытанні хапае. Так, нядаўна падчас планавай праверкі аднаго з арандатараў устаноўлены шэраг парушэнняў, выдадзена прадпісанне, выкананне якога зараз на кантролі. Ёсць у гэтым плане і станоўчыя прыклады. Так, прыкметна папрыгажэла наваколле возера Павульскага, арандатарам якога з мінулага года з’яўляецца ПТУП “Асланов і Ко”: тут праведзена ачыстка берагавой тэрыторыі, устанаўліваюцца скрыні для смецця, вядзецца будаўніцтва альтанак.
Вядома ж, якой будзе экалагічная абстаноўка ў раёне, залежыць не толькі ад дзейнасці нашай інспекцыі і суб’ектаў гаспадарання, але найперш ад паводзін кожнага ўшачаніна. Не варта чакаць, што нехта прыйдзе і навядзе парадак ля нашых сядзіб, скосіць пустазелле, прыбярэ сметнік, здасць металалом – усё гэта можам і павінны рабіць мы самі, калі хочам жыць у дастойных умовах, дыхаць чыстым паветрам, ганарыцца прыгажосцю роднага краю.
І.ПАДГОЛ, начальнік раённай інспекцыі прыродных рэсурсаў і аховы навакольнага асяроддзя.
