Пытанняў, з якімі звяртаюцца індывідуальныя прадпрымальнікі, рамеснікі ў раённы аддзел Фонду сацыяльнай абароны насельнітцтва, нямала. Сёння мы папрасілі начальніка аддзела Алену Васільеўну Пашковіч праз газету даць адказы на найбольш актуальныя з іх. Спадзяемся, гэтая інфармацыя будзе карысная многім.
– Ці абавязаны рамеснік плаціць узносы ў Фонд сацыяльнай абароны насельніцтва? І калі так, якая іх сума?
– Фізічныя асобы, якія займаюцца рамеснай дзейнасцю па заяўным прынцыпе без дзяржаўнай рэгістрацыі ў якасці індывідуальных прадпрымальнікаў, маюць права добраахвотнага ўдзелу ў дзяржаўным сацыяльным страхаванні. Калі рамеснік выявіць жаданне плаціць узносы, яму неабходна будзе стаць на ўлік у органах Фонду сацабароны насельніцтва па месцы жыхарства.
Што датычыцца памеру ўзносаў, то ён зараз складае: 29 працэнтаў прыбытку – на пенсійнае страхаванне, 6 – на сацыяльнае. Прычым, рамеснік можа па сваім выбары аплачваць адзін з названых відаў страхавання ці адразу два – 35 працэнтаў прыбытку. Дарэчы, суму апошняга вызначае сам рамеснік, аднак яна не павінна быць меншай за мінімальную заработную плату, устаноўленую і праіндэксаваную ў адпаведнасці з заканадаўствам. Напрыклад, у сакавіку 2016га “мінімалка” складала 2 мільёны 300 тысяч рублёў, адпаведна, мінімальны плацеж за гэты месяц складзе: у выпадку выплаты ўзносаў толькі на пенсійнае страхаванне – 667 тысяч, толькі на сацыяльнае – 138, на абодва віды – 805 тысяч рублёу.
– Ці існуюць ільготы па адлічэннях у Фонд сацабароны для індывідуальных прадпрымальнікаў, у якіх трое і больш дзяцей (мнагадзетных сямей)?
– На жаль, не. Ільгота ў выглядзе добраахвотнага парадку выплаты ўзносаў у бюджэт Фонду ўстаноўлена толькі для ІП, якія адначасова з ажыццяўленнем прадпрымальніцкай дзейнасці знаходзяцца ў працоўных ці звязаных з імі адносінах. Гэта можа быць членства (удзел) у арганізацыях, валоданне маёмасцю юрыдычных асоб і выкананне функцый іх кіраўнікоў. Па сваім жаданні выплачваць узносы могуць таксама прадпрымальнікі, якія атрымліваюць пенсію, маюць права на дапамогу па доглядзе за дзіцем ва ўзросце да трох гадоў, у дзённай форме атрымліваюць прафесійнатэхнічную, сярэднюю спецыяльную, вышэйшую адукацыю. Іншыя выключэнні ў адносінах ІП заканадаўствам не ўстаноўлены.
– Я замежны грамадзянін, рэзідэнт Беларусі і індывідуальны прадпрымальнік. Да 1 студзеня 2016 года быў вызвалены ад плацяжоў у Фонд. Што зараз змянілася?
– У канцы мінулага года Прэзідэнт падпісаў указ “Аб пытаннях сацыяльнага забеспячэння”, паводле якога замежныя грамадзяне і асобы без грамадзянства, якія працуюць у Беларусі ці з’яўляюцца індывідуальнымі прадпрымальнікамі, падлягаюць абавязковаму дзяржаўнаму сацыяльнаму страхаванню на ўмовах, устаноўленых заканадаўствам для грамадзян нашай краіны. Гэта значыць, з 1 студзеня 2016 года замежныя грамадзяне, якія з’яўляюцца ІП, абавязаны выплачваць страхавыя ўзносы ў бюджэт Фонду ў агульнапрынятым парадку.
– Я індывідуальны прадпрымальнік, але адначасова працую ў арганізацыі. Да 1 студзеня 2016 года – па кантракце, а потым па дагаворы найму. Арганізацыя аплачвае ўзносы ад сумы заробку ў Фонд. Акрамя формы працоўных адносін, нічога не змянілася. Чаму тады я як ІП абавязаны плаціць узносы ў Фонд?
– Пад кантрактам разумеюцца працоўныя адносіны, а пад дагаворам найму – грамадзянскаправавы дагавор – у гэтым ёсць прынцыповая розніца. Добраахвотна аплачваць узносы, як мы расказвалі вышэй, могуць толькі ІП, якія адначасова з ажыццяўленнем прадпрымальніцкай дзейнасці знаходзяцца ў працоўных ці звязаных з імі адносінах. Такім чынам, за перыяд, калі вы перайшлі з работадаўцам на грамадзянскаправавыя, а не працоўныя адносіны, падставы для вызвалення ад выплаты ўзносаў у бюджэт Фонду зніклі.
Кацярына КАВАЛЕЎСКАЯ.