Такую з’яву, як непаўналетняя злачыннасць, цалкам выкараніць няпроста. Бо былі і ёсць бацькі, якія задачу па выхаванні дзяцей перакладваюць на вуліцу. Прычым не толькі тыя грамадзяне, чый позірк затуманены спіртным, але і адносна паспяховыя, занятыя папаўненнем сямейнага бюджэту – часу на размовы з нашчадкамі не хапае, ды і, на думку асобных, для гэтага існуе школа. Вось і даводзіцца апошняй не толькі навучаць, але і выяўляць, кантраляваць, ставіць на ўлік… Зрэшты, “лячэннем” падлеткаў, якія аступіліся, займаецца шэраг іншых службаў, у тым ліку інспекцыя па справах непаўналетніх райаддзела міліцыі. Пра тое, як гэта адбываецца і якія вынікі прыносіць, мы папрасілі расказаць старшага ўчастковага інспектара ІСН Ушацкага РАУС Канстанціна Васільевіча АЎСІЕВІЧА:
– Асноўная прычына падлеткавай злачыннасці – сапраўды, бескантрольнасць з боку бацькоў, асабліва ў вячэрні і начны час. Дарослыя не цікавяцца, чым заняты дзеці па-за домам, з кім яны маюць зносіны, што робяць. Пра гэта сведчыць той факт, што за першае паўгоддзе 2017 года мы склалі ўжо 4 адміністрацыйныя пратаколы па арт.17.13 (невыкананне бацькамі абавязкаў па суправаджэнні дзяцей, якія не дасягнулі шаснаццацігадовага ўзросту, пасля 23.00). За аналагічны перыяд 2017-га іх было 13.
– Наколькі нам вядома, сёлета ўзровень злачыннасці сярод непаўналетніх на Ушаччыне значна знізіўся…
– Так. Летась падлеткамі на тэрыторыі раёна было ўчынена 6 злачынстваў, большасць з іх (4) – крадзяжы. Сёлета сітуацыю, на шчасце, удалося стабілізаваць – падобных фактаў не зарэгістравана. Аднак гэта не падстава расслабляцца! За першае паўгоддзе 2017-га разгледжана 18 спраў аб адміністрацыйных правапарушэннях, да якіх маюць дачыненне непаўналетнія.
– Якая работа праводзіцца ў раёне для таго, каб правапарушэнняў станавілася менш?
– Выкарыстоўваем самыя розныя формы і метады. Стан арганізацыі работы па прафілактыцы злачынстваў і правапарушэнняў рэгулярна абмяркоўваецца на пасяджэннях камісіі па справах непаўналетніх райвыканкама, на саветах прафілактыкі аддзела адукацыі, спорту і турызму, непасрэдна па месцы жыхарства падлеткаў. Рэгулярна праводзім акцыі “Бяспечнае лета”, “Сям’я без насілля”, а таксама рэйды па сем’ях, у якіх непаўналетнія прызнаны ў сацыяльна небяспечным становішчы, знаходзяцца на ўліку ў інспекцыі.
Разумеючы, што часта дзеці становяцца ўдзельнікамі супрацьпраўных учынкаў з-за незанятасці, значную ўвагу ў прафілактычнай рабоце надаём гэтаму напрамку. Непаўналетнія, асабліва з нядобранадзейных сямей, па максімуме прыцягваюцца да заняткаў у гуртках па інтарэсах, спартыўных секцыях. Акрамя таго ў раёне склалася сістэма па раннім выяўленні сямейнай нядобранадзейнасці – за адзначаны перыяд у аддзел адукацыі, спорту і турызму райвыканкама, камісію па справах непаўналетніх аб гэтым паступіла 57 паведамленняў. Па ўсіх фактах праведзены праверкі.
– Што значыць для падлетка “паставілі на ўлік у міліцыі”?
– Кантроль на працягу 6 месяцаў. Калі за гэты час ён паўторна не здзейсніць правапарушэнне або злачынства, то з уліку здымаецца. У адваротным выпадку тэрмін кантролю падаўжаецца, а запіс пра “перасячэнне мяжы” закону заносіцца ў рэспубліканскі банк даных аб правапарушэннях. Калі ж падлетак здзяйсняе злачынства, ён аўтаматычна трапляе ў такую базу пасля разгляду справы. Усё гэта ў будучым можа згуляць з непаўналетнім злы жарт. Напрыклад, паступіць у многія навучальныя ўстановы (не толькі сілавыя) ці ўладкавацца на прэстыжныя пасады, адбор на якія праводзіцца на конкурснай аснове, наўрад ці атрымаецца.
Падрыхтавала Кацярына КАВАЛЕЎСКАЯ.
