Экскурсіі па сваіх кватэрах пяцёра жыхароў жыллёва-будаўнічага кааператыва № 11 (апошні здадзены дом па вуліцы Віцебскай) праводзілі неаднойчы. З гэтым домам выдатна знаёмы як раённыя ўлады, так і камісіі рознага ўзроўню. А пачалося ўсё пасля шчаслівага перасялення ўладальнікаў тых пяці кватэр, якія здаваліся з поўнай аддзелкай. Прыгожы знешне, з чарапічным дахам, выдатнай планіроўкай, прасторнымі пакоямі і палавіннай аплатай (як мнагадзетным сем’ям). Чаго яшчэ жадаць. Толькі радасць навасёлаў хутка азмрочылася… пачалі адвальвацца шпалеры, станавіліся фіялетава-іржавымі ці праступала чарната. Ды і мноства розных пытанняў паўстала ва ўладальнікаў кватэр. Хто і калі павінен пламбаваць лічыльнікі і здымаць першапачатковыя паказанні? Чаму плацім за тэхабслугоўванне і капрамонт, калі дом на гарантыі? На падставе якіх абмераў робяцца налічэнні за тэхабслугоўванне? Усе гэтыя пытанні хвалявалі навасёлаў і, канечне, паўстануць і ў іншых.
Жыхар – апошні кантралёр
Сітуацыя з прыгаданым кааператывам, у прынцыпе, вядомая ўсім, хто некалі будаваўся. Хібы пры будаўніцтве былі, ёсць і будуць па самых розных прычынах. На жаль, яны застаюцца нават пры наяўнасці кантралёра за якасцю непасрэдна ў будаўнічай арганізацыі, і ва ўпраўленні капітальнага будаўніцтва і дзяржбуднагляду, якія таксама сочаць за якасцю выканання работ. А жыхары, як самыя прыдзірлівыя і зацікаўленыя кантралёры, знаходзяць брак і пасля. Так, апошняе слова менавіта за ўладальнікамі кватэр. І ўважліва аглядаць свае пакоі варта да падпісання пашпартоў. Пасля дабіцца выпраўлення складаней, як і ўстанавіць прычыну хібаў.
Дарэчы, у жыхароў прыгаданага дома адразу не было заўваг на паклейку шпалер. Камісіі ж, якія выклікаліся для праверкі, пацвердзілі завышаную вільгаць паветра ў памяшканнях – у асобных кватэрах яна даходзіла да 85 працэнтаў пры дапушчальнай па санітарных нормах – 60, аднак без дакладнага ўказання прычын (што, дарэчы, не дае падстаў прад’яўляць прэтэнзіі да будаўнікоў). Да ведама жыхароў даведзены парады па правільнай эксплуатацыі кватэр. Рэгулярнае праветрыванне і забарона кіпячэння, сушкі бялізны на батарэях, што, дарэчы, недапушчальна нават у абжытым доме. Пры наяўнасці ж шклопакетаў, якімі аснашчаны ўсе сучасныя шматпавярхоўкі, праветрыванне проста неабходна. Нямецкія вытворцы, дарэчы, раяць пакупнікам гэта рабіць праз кожныя дзве гадзіны.
Райвыканкамам жа былі прыняты меры па ўзмацненні ацяплення названага дома для хутчэйшай прасушкі сцен. Усё разам прынесла свой плён. ПМК-66, а менавіта гэта будаўнічая арганізацыя была падрадчыкам пры ўзвядзенні дома, не адмаўлялася ад прад’яўленых прэтэнзій, у тым ліку і са сценамі. Яны апрацаваны антысептыкам, ліквідуецца брак, які ляжыць на паверхні, як, напрыклад, закрыты лічыльнік у адной з кватэр. З жыхаром кожнай кватэры абгаварылі і знайшлі варыянты далейшых дзеянняў. Існуе і двухгадовы гарантыйны тэрмін, у працэсе якога будзе ўхіляцца скрыты брак.
На выбар кааператыва
– Адлічэнні на капітальны рамонт не залежыць ад таго, на гарантыі дом або не, паколькі яны робяцца дзеля таго, каб у будучым, калі дому будзе патрэбны рамонт, былі на гэта сродкі. Яны акумулююцца на асобым рахунку і згодна з планам праводзіцца рамонт жыллёвага фонду, – паведаміў юрысконсульт жыллёва-камунальнай гаспадаркі І.Д.Датаў. – Жыллёва-будаўнічы кааператыў – толькі ўвесь, а не асобныя ўладальнікі кватэр, маюць права не заключаць адпаведны дагавор з УП ЖКГ. Могуць стварацца таварыствы ўласнікаў нават з некалькіх кааператываў, выбірацца альтэрнатыўны камунгасу выканаўца работ. Аднак паколькі ў нашым населеным пункце такіх няма, а папярэдняя практыка паказвае, што самастойна і амаль адначасова не рэальна сабраць з жыхароў сумы, патрэбныя на рамонт даху, уцяпленне сцен і іншае, то выгадней заключаць дагавор з камунгасам.
На гарантыі і тэхабслугоўванні
Была логіка ў пытаннях жыхароў, чаму бярэцца плата за тэхабслугоўванне, калі дом на гарантыі і ў выпадку выхаду са строю, напрыклад, абсталявання, гэта павінен ухіліць падрадчык. Так, гарантыйныя выпадкі ў любым выпадку лягуць на плечы падрадчыка. Аднак гэта датычыцца толькі паломак, браку (па віне будаўнікоў), пералік жа работ па тэхабслугоўванні намнога шырэйшы. Сюды ўваходзіць, напрыклад, расчыстка тэрыторыі ад снегу, экстранныя выклікі – забілася каналізацыя (што ўжо было нават у новым доме), рэгуляванне ацяплення і многае іншае. Як і ў папярэднім выпадку, кааператыў можа наймаць дворнікаў, сантэхнікаў для абслугоўвання свайго дома і плаціць ім асобна. Калі ж прыняты на абслугоўванне камунгасам, то плата ідзе адразу, незалежна ад таго, на гарантыі дом або не. Пасля прыняцця дома на тэхабслугоўванне работнікі камунгаса пламбіруюць і лічыльнікі. Тэхаплата робіцца на падставе тэхпашпарта на кватэру, у якім указваецца фактычны метраж кватэры. Робіцца ён супрацоўнікамі тэхнічнай інвентарызацыі па кожнай кватэры індывідуальна, паколькі нават у адным пад’ездзе і пры аднолькавай планіроўцы можа разыходзіцца.
Наогул вельмі многа пытанняў паўстае як падчас будаўніцтва жылля, так і пасля. Таму асноўная парада, якую можна даць членам наступных жыллёва-будаўнічых кааператываў: сур’ёзна аднясіцеся да выбару старшыні і бухгалтара. Людзі гэты павінны мець вольны час, цвёрды характар, нялішнім будзе і загадзя пераняць вопыт ранейшых забудоўшчыкаў.
В.КАРАЛЕНКА.
