Фестываль “Вытокі. Крок да Алімпу” распачаў сёлета трэці сезон і ў трэці раз завітаў на Віцебшчыну – пасля Оршы і Полацка права прыняць яркае спартыўна-культурнае свята атрымала Глыбокае. Па традыцыі на фестывальныя мерапрыемствы да суседзяў завіталі і мы.
Адметны статус праекта пацвердзіў удзел у ім гасцей самага высокага рангу. Падчас цырымоніі адкрыцця старшыня Нацыянальнага алімпійскага камітэта Віктар Лукашэнка выказаў меркаванне, што праз 10-20 год хтосьці з юных удзельнікаў гэтага свята будзе стаяць на высокім п’едэстале і прыгадваць, што спартыўную кар’еру пачынаў з “Вытокаў”, і перадаў раёну падарункавы сертыфікат на 100 тысяч рублёў на развіццё спартыўнай інфраструктуры (на здымку). Пра тое, што больш двух мільёнаў беларусаў рэгулярна займаюцца спортам, паведаміў прэм’ер-міністр Раман Галоўчанка, а таксама падкрэсліў, што сучасныя комплексы ўзведзены нават у невялікіх гарадах. Ну а наш дэпутат, старшыня Палаты прадстаўнікоў Нацыянальнага сходу Рэспублікі Беларусь Уладзімір Паўлавіч Андрэйчанка нагадаў, што ў Віцебшчыны вялікі вопыт правядзення фестываляў і выдатныя спартыўныя традыцыі.
Усё вышэй сказанае яскрава пацвердзілі падзеі фестывалю. Адных толькі пляцовак алімпійскага квесту, якія прэзентавалі розныя віды спорту, было ў горадзе тры дзясяткі. А ў забегу лёгкаатлетаў да 9 год прыняла ўдзел паўтысячы хлопчыкаў і дзяўчынак! Трэнеры ж тым часам абменьваліся вопытам на семінарах. І, безумоўна, вельмі яркай падзеяй стала свята на прыгожым стадыёне раённай ДЮСШ – у пятніцу якраз адзначаўся Міжнародны алімпійскі дзень, і дзейства мела ўсе атрыбуты сапраўдных Гульняў: убачылі мы і запальванне “алімпійскага агню” лепшымі спартсменамі Глыбоччыны, і нават мішку, які ўзнёсся ў паветра, як калісьці сімвал Алімпіяды-80.
Мы ж тым часам праводзілі пэўныя паралелі: у глыбоцкай спартшколе займаецца прыкладна такая ж колькасць вучняў, як і ва ўшацкай, і гэта прытым, што наш раён амаль утрая меншы па насельніцтве. Практыкуюць глыбачане лёгкую атлетыку, футбол, валейбол і грэка-рымскую барацьбу, ва ўшацкіх дзяцей выбар крыху большы, бо працуюць пяць аддзяленняў. Зусім не хачу пакрыўдзіць шаноўных суседзяў, проста мушу падкрэсліць, якая спартыўная наша маленькая радзіма.
◆ Нацыянальны алімпійскі камітэт, Федэрацыя прафсаюзаў Беларусі і іншыя арганізатары праекта, безумоўна, робяць важную справу – імкнуцца адкрываць культурны і спартыўны патэнцыял рэгіёнаў, прыцягваюць беларусаў да здаровага ладу жыцця.
А вось па колькасці славутасцяў з Глыбокім цяжка паспаборнічаць. Журналісты ўпэўніліся ў гэтым падчас адмысловага прэс-тура. Проста зачараваў сваёй велічнасцю архітэктурны помнік ХVII стагоддзя – Сабор Раства Прасвятой Багародзіцы. Неверагодна прыгожы звонку і ва ўнутраным убранстве, ён захоўвае старажытныя таямніцы – і нам пашанцавала крыху да іх дакрануцца, прайшоўшы са свечкамі па падземных сутарэннях храма і ўзняўшыся на 24-мятровую вышыню званіцы. Дарэчы, мецэнат Іосіф Корсак, за сродкі якога быў пабудаваны храм, увекавечаны ў скверы славутых землякоў – гэта яшчэ адно месца, куды абавязкова прыводзяць турыстаў. У ліку 11 тутэйшых знакавых персон – канструктар самалётаў “СУ” Павел Сухі, заснавальнік айчыннага тэатра Ігнат Буйніцкі, які, прынамсі, разам са сваёй трупай “тэлепарціраваўся” ў сучаснасць, каб навучыць журналістаў народным танцам. Зрэшты, на Ушаччыне славутых ураджэнцаў таксама шмат, і падобны сквер, пачатак якому ўжо пакладзены, будзем спадзявацца, прырасце новымі выявамі.
“Вытокі” здзіўлялі гасцей самымі рознымі “фішкамі”. У трэцім сезоне фестываль аздобілі выязныя спектаклі беларускіх тэатраў – у Глыбокае прывезлі пастаноўку “Той самы Мюнхаўзэн”: як вядома, у горадзе ёсць помнік гэтаму персанажу. Не абышлося без дэгустацыі згушчонкі і іншых мясцовых прысмакаў, інтэлектуальных турніраў, паказаў калекцый айчыннага адзення, вакальнага конкурсу і, канечне, феерверку.
У наступны раз “Вытокі” адправяцца ў Касцюковічы. Цікава, дарэчы, што менавіта на Магілёўшчыне, у вёсцы Карасі прызямліўся запушчаны ў паветра на глыбоцкім стадыёне алімпійскі мішка. Ну а мы будзем чакаць чарговага вяртання фестывалю ў Прыдзвінне.
Наталля БАГДАНОВІЧ.
