Пра магчымасць атрымання бязвыплатнай субсідыі на адкрыццё ўласнага бізнесу беспрацоўным жыхарам Ушаччыны мы расказвалі не раз. Аднак да гэтай тэмы ёсць нагода вярнуцца: з 14 чэрвеня ўступілі ў сілу важныя новаўвядзенні.
– Зараз зменены тэрмін разгляду заявы аб аказанні такой дзяржпадтрымкі, пашыраны пералік яе атрымальнікаў, іх абавязацельствы, перагледжаны меры адказнасці за невыкананне ўмоў дагавора, – патлумачылі ў раённай службе занятасці. – Пры гэтым базавыя патрабаванні для прэтэндэнтаў на атрыманне субсідыі засталіся ранейшымі: імі могуць стаць грамадзяне, якія дасягнулі 18-гадовага ўзросту і афіцыйна зарэгістраваліся ў якасці беспрацоўных. Ім неабходна падрыхтаваць тэхніка-эканамічнае і фінансавае абгрунтаванне па выбраным відзе індывідуальнай прадпрымальніцкай дзейнасці (бізнес-план) і падаць адпаведную заяву ва ўпраўленне па працы, занятасці і сацабароне райвыканкама.
Ёсць абмежаванне: беспрацоўным у выпадку, калі з дня спынення імі індывідуальнай прадпрымальніцкай дзейнасці прайшло менш 12 месяцаў, а таксама калі раней яны ўжо атрымлівалі субсідыю, фінансавая падтрымка не аказваецца.
Новы зараз тэрмін разгляду дакументаў – 10 рабочых дзён (раней было 14 каляндарных). Пашырыўся і пералік патэнцыяльных атрымальнікаў фінансавай падтрымкі. Раней на яе маглі прэтэндаваць беспрацоўныя, якія плануюць адкрыць прыватныя ўнітарныя прадпрыемствы, зарэгістравацца як ІП ці рамеснікі з выплатай рамеснага збору. Сёння ж такое права атрымалі таксама грамадзяне, якія маюць намер ажыццяўляць самастойную прафесійную (так званыя самазанятыя), а таксама рамесную дзейнасць з выплатай падатка на прафесійны даход. А вось ПУП у новым пераліку няма – і гэтую акалічнасць трэба ўлічваць пры падрыхтоўцы бізнес-плана. Дарэчы, з яго распрацоўкай у службе занятасці гэтак жа гатовы аказаць садзейнічанне.
Сума субсідыі – 15 бюджэтаў пражытачнага мінімуму (з 1 жніўня гэта 7315,8 рубля).
Дагавор, які заключаецца, прадугледжвае шэраг абавязацельстваў, пры невыкананні якіх субсідыя падлягае вяртанню з налічэннем няўстойкі. Як і раней, галоўнай падставай для гэтага з’яўляецца нямэтавае выкарыстанне сродкаў. Па новых умовах пачынаючы прадпрымальнік павінен ажыццяўляць сваю дзейнасць не менш 9 месяцаў на працягу года (раней было 6). І ўвесь гэты час неабходна выплачваць падаткі і адлічэнні ў Фонд сацыяльнай абароны насельніцтва.
За атрыманнем кансультацыі можна звярнуцца па адрасе: г.п.Ушачы, вул.Ленінская, д.12 (кабінеты №49 і 50) ці па тэлефонах 5-73-51, 5-88-57.
Падрыхтавала Кацярына КАВАЛЕЎСКАЯ.
