Адным са старажылаў нашага раёна з’яўляўся ветэран Вялікай Айчыннай вайны М.С.Іваноў, які пражыў 101 год. Маленькая акалічнасць з быту Міхаіла Сцяпанавіча: у яго доме ў Рагуцкіх заўсёды стаяў бітон крынічнай вады з Вашкова, выключна якую і ўжываў. Дарэчы, не толькі ён адзін. Сцяжына да ключа не зарастала ніколі, а сёлета яго пачысцілі, добраўпарадкавалі і нават стварылі месца для адпачынку. І было гэта ініцыятывай людзей, якія пражываюць у наваколлі.
Асноўны завадатар – Уладзімір Іосіфавіч Лешукевіч – дачнік з Санкт-Пецярбурга, які даўно стаў сваім, бо ў 2019 годзе перабраўся на пастаяннае месца жыхарства ў Беларусь, ды і да гэтага прыязджаў кожнае лета. Ён разам з Валерыем Юрэвічам, Васілём Жарнасекам, Сяргеем Бугаём з Вашкова, Ігарам Лёля з Петухоў і абсталёўваў крыніцу “па навуцы”. Папоўніла добраахвотную брыгаду работнікам Жарскага сельвыканкама Вячаславам Маслюком яго старшыня Святлана Міхейка. І сама неаднойчы выходзіла на суботнікі – разам з Таццянай Лешукевіч ачысцілі паляну ад смецця і лістоты.
Крыніцы там здаўна было нават дзве, толькі адна зарасла настолькі, што вада ледзь прабівалася з зямлі. Таму найперш чысцілі дно. Звычайнымі рыдлёўкамі, папярэдне выцягнуўшы старыя бетонныя кольцы. Гэта і аказалася самай працаёмкай справай. Проста так іх не падняць нават пецярым моцным мужчынам. Вельмі выручыла лябёдка, за якой У.Лешукевіч нават спецыяльна ездзіў у Паўночную сталіцу Расіі. Ёй і падымалі, і ўстаўлялі ўжо чыста вымытыя кольцы, прымацаваўшы пад’ёмнік-лябёдку да дрэў. Адно з колаў зусім развалілася, таму шукалі новае. Ім, што засталося з былога калодзежа знесенага дома, падзялілася старшыня сельвыканкама, а давезці да месца дапамаглі спецыялісты водаканала.
Каб не сыпалася лісце, Уладзімір Іосіфавіч зрабіў драўляныя накрыўкі. А таксама прабіў у кожным з бетонных колаў адтуліны для сцёку. У адной з’явілася трубка – варта падставіць ёмістасць нават з вузкім горлам і яна хутка напоўніцца. Можна па-ранейшаму зачэрпнуць вядром ці напоўніць бутлю каўшом, які вісіць побач.
З’явіліся ля крынічак і дзве лаўкі з бярвёнаў. Наўмысна зрабілі такія масіўныя, каб не ўкралі, як папярэднія – лёгкія, якімі падзялілася школа.
С.Міхейка: “Вашкоўская крыніца – вельмі папулярная ў насельніцтва. Пра яе ведаюць і ў Гарадцы, і ў Ільюшыне, ваду з яе вязуць у гарады дачнікі. Нават калі мы працавалі на добраўпарадкаванні, спыняліся машыны, прыйшла за вадой шматдзетная сям’я з Полацка. Толькі вельмі б хацелася, каб людзі паважліва ставіліся да працы іншых – абсалютна бясплатнай і на агульную карысць. І было б наогул выдатна, калі б жыхары ўсіх населеных пунктаў праяўлялі падобную ініцыятыву, а сельвыканкам заўсёды падтрымае і па меры сіл дапаможа”.
Дарэчы, на гэтым добраўпарадкаванне крыніцы не завершана, цяпер У.Лешукевіч думае зрабіць больш зручным падыход ад дарогі, а для гэтага найперш трэба пакласці вадасцёкавую трубу. Далучайцеся, прапаноўвайце варыянты, дапамога лішняй не бывае і заўсёды вітаецца.
Вольга Караленка
