“Прамая лінія” з галоўным урачом Ушацкай цэнтральнай раённай бальніцы С.А.МАІСЕЕВЫМ, якая праходзіла ў рэдакцыі на бягучым тыдні, атрымалася надзвычай ажыўленай. Са сваімі пытаннямі, словамі падзякі і нават слушнымі прапановамі да Сяргея Анатольевіча звярнулася каля дзясятка нашых чытачоў. Прапануем вашай увазе найбольш цікавыя звароты ўшачан.
– Калі ў паліклініцы будзе ўведзена талонная сістэма прыёму пацыентаў? Маю на ўвазе магчымасць трапіць да патрэбнага доктара ў канкрэтны час, указаны ў талоне, а не чакаць чаргі, стоячы пад кабінетам.
М.Мацвеенка, агр.Кублічы.
– Талонная сістэма ў нас ужо ўкаранёна. Дарэчы, інфармацыя пра гэта размешчана на рэгістратуры паліклінікі, а непасрэдна ў талонах указаны час прыёму. Вось толькі на гэта нашы пацыенты рэдка звяртаюць увагу і па старой звычцы займаюць чэргі.
Калі вы з талонам прыйдзеце ў вызначаны час да пэўнага спецыяліста, ён абавязаны будзе вас прыняць. Але, вядома, пры ўмове, што ў некага не знойдзецца талона з больш раннім часам прыёму. Нельга забываць і пра магчымасць экстранных выпадкаў, калі да ўрача трапляюць “цяжкія” пацыенты паза чаргой. У такім выпадку, зразумела, час прыёму іншых пацыентаў будзе змяшчацца.
Карыстаючыся выпадкам, нагадаю таксама пра магчымасць запісацца на прыём да нашых спецыялістаў, нават не выходзячы з дому. Зрабіць гэта можна на афіцыйным сайце Ушацкай ЦРБ.
– Наколькі я ведаю, зараз у бальніцы няма ўрача-эндакрынолага. У такім разе да якога спецыяліста можна звярнуцца, каб праверыць шчытападобную залозу?
А.Іванова, г.п.Ушачы.
– Сапраўды, узгаданага спецыяліста ў нас няма. І, трэба сказаць, у бліжэйшы час наўрад ці будзе. Справа ў тым, што стаўка ўрачаэндакрынолага ўводзіцца пры ўмове наяўнасці ў рэгіёне пэўнай колькасці насельніцтва – на Ушаччыне яна меншая. Але, думаю, гэтая акалічнасць не павінна істотна паўплываць на якасць абслугоўвання нашых пацыентаў: атрымаць эндакрыналагічную дапамогу можна ва ўчастковага тэрапеўта, урача агульнай практыкі.
– Ці можна ў паліклініцы прайсці ультрагукавое даследаванне сэрца? І калі так, ці платная гэта працэдура?
В.Чорная, в.Градзянец.
– Можна. Па медыцынскіх паказаннях ультрагукавое даследаванне праводзіцца на бясплатнай аснове. Калі ж гэта ўласная ініцыятыва грамадзяніна, то праверыць стан свайго сэрца ён можа платна, загадзя запісаўшыся да спецыяліста.
– Фельчарскаакушэрскі пункт у Старым Сяле зараз не працуе. Спадзяемся, гэта часовая мера… (з такім пытаннем да Сяргея Анатольевіча звярнуліся адразу дзве жыхаркі ўзгаданага населенага пункта).
– Канечне, аб закрыцці ФАПа ў Старым Сяле гаворкі не ідзе. Мясцовы фельчар, сапраўды, быў некаторы час у водпуску – ужо на наступным тыдні ён зноў прыступіць да выканання сваіх прафесійных абавязкаў.
– У мяне не пытанне, а хутчэй – просьба. Хацелася б, каб ва ўсіх кабінетах педыятрычнага аддзялення паліклінікі паралельна са звычайнымі выкарыстоўваліся электронныя вагі. Думаю, гэта было б максімальна зручна як для медыцынскага персаналу, так і для нас, маладых матуль з дзеткамі.
І.Пышная, г.п.Ушачы.
– Дзякую за Ваша меркаванне і неабыякавасць. У бліжэйшы час абавязкова разгледзім гэтае пытанне.
Дарэчы, Ірына Пышная на “прамую лінію” звярнулася яшчэ і для таго, каб падзякаваць Сяргею Анатольевічу, а таксама ўрачугінеколагу Наталлі Васільеўне Дрозд, урачупедыятру Святлане Іванаўне Ерашовай за іх высокі прафесіяналізм і чулыя адносіны да пацыентаў.
С.А.Маісеева як кіраўніка медыцынскай службы Ушаччыны не маглі не парадаваць і цёплыя словы ад жыхаркі вёскі Двор Пліна Ніны Андрэйчык. Адрасаваліся яны работнікам кабінета анкалогіі паліклінікі пад кіраўніцтвам Надзеі Васільеўны Карабань, а таксама фельчару мясцовага ФАПа Андрэю Анатольевічу Карповічу.
* * *
Адна гадзіна – менавіта столькі было вызначана для правядзення “прамой лініі” – праляцела імгненна. За гэты час давялося ўпэўніцца: тэма медыцынскага абслугоўвання насельніцтва – адна з прыярытэтных ва ўшачан. Таму ўжо зараз мы дамовіліся з Сяргеем Анатольевічам Маісеевым аб наступным інтэрв’ю. Калі ў вас ёсць пытанні на ўзгаданую тэму, падзяліцеся імі з намі па рэдакцыйным нумары 27361.
Кацярына КАВАЛЕЎСКАЯ.
