Вольга Іванаўна Карчэўская, якая выступае каардынатарам гэтай работы ў раёне, прааналізавала ход рэалізацыі Дэкрэта №18, прасачыла дынаміку сямейнай неблаганадзейнасці, расказала аб найбольш эфектыўных метадах работы з цяжкімі сем’ямі, з абавязанымі бацькамі. Як адзначыла Вольга Іванаўна, пастаянныя рэйды, настаўніцка-бацькоўскія патрулі, мэтанакіраваная работа ўсіх зацікаўленых службаў даюць станоўчы вынік, але трэба імкнуцца да большага.
Прысутныя былі азнаёмлены з вынікамі праверкі сельсаветаў па правядзенні работы па ахове правоў дзяцей і рэалізацыі Дэкрэта № 18, дзе была звернута ўвага на недахопы, парушэнні. Было вырашана ў самы бліжэйшы час прыняць неабходныя меры, каб выправіць сітуацыю.
Слова было дадзена ўсім, у чыіх сілах паўплываць на сітуацыю з сацыяльным сіроцтвам у раёне. Усе зышліся ў адным: прычынай усяму – п’янства. Як з ім змагацца – пытанне адкрытае: метадаў, здаецца, і шмат, але больш эфектыўныя яшчэ трэба шукаць.
Станоўчы вопыт ужо ёсць, трэба зрабіць яго заканамернасцю. У прынятай падчас пасяджэння пастанове былі вызначаны канкрэтныя меры па паляпшэнні работы па выкананні Дэкрэта Прэзідэнта Рэспублікі Беларусь №18 – неабходна добрасумленнае і дзейснае выкананне абавязкаў, ускладзеных Дэкрэтам на ўсіх адказных асоб. А яшчэ, вельмі важна шукаць нестандартныя метады, больш актыўна выкарыстоўваць чалавечы фактар.
