Гісторыя беларускага кіно пачынаецца з 17 снежня 1924 года, калі была заснавана Беларуская дзяржаўная ўправа па справах кінематаграфіі і фатаграфіі, скарочана – “Белдзяржкіно”. Тады і былі зняты першыя хранікальныя стужкі. Праз 4 гады заснавана кінастудыя “Савецкая Беларусія”, якая з-за адсутнасці ўласнай тэхнічнай базы да 1939 года працавала ў Ленінградзе. На “Беларусьфільме” знята больш за 500 мастацкіх фільмаў, тысячы дакументальных і 100 мультыплікацыйных стужак. У 1994 годзе 17 снежня Указам Прэзідэнта аб’яўлена ў нашай краіне прафесійным святам айчынных кінематаграфістаў – Днём беларускага кіно.
Напярэдадні гэтай даты мы сустрэліся з тымі, хто па сваіх прафесійных абавязках знаёміць нас з класікай, а таксама навінкамі нацыянальнай кінаіндустрыі, — работнікамі Ушацкай райкінавідэасеткі.«Больш фільмаў, цікавых і яркіх» — такія пажаданні выказваюць гледачы да сучаснай кінаіндустрыі. З той пары, як браты Лум’ер падарылі чалавецтву новы від мастацтва, створана нямала кінашэдэўраў. Аб тым, якія з іх карыстаюцца ва ўшачан найбольшай папулярнасцю, ды і ўвогуле, што сёння ўяўляе сабой раённая кінавідэасетка, мы папрасілі расказаць дырэктара камунальнага ўнітарнага прадпрыемства кінавідэапракату Марыну Пятроўну МАКРЫДЗІНУ.
— У сістэмы кінавідэаабслугоўвання насельніцтва на Ушаччыне вельмі багатая гісторыя. Пачыналі мы як асобная арганізацыя, пазней пэўны час уваходзілі ў склад аддзела культуры, а перад Новым 2010 годам — 31 снежня зноў адасобіліся, стаўшы «Ушацкай райкінавідэасеткай».
На сённяшні дзень пункты відэапаказу ёсць у гарпасёлку, аграгарадках Ільюшына, Кублічы, Вялікія Дольцы, Вяркуды, Арэхаўна, вёсках Дубраўка, Жары, Селішча. Сёлета значна абноўлена іх тэхнічная база, закуплены новыя сучасныя відэапраектары. За год праходзіць больш за 2 тысячы сеансаў.
Каб зацікавіць гледачоў, трэба ўлічваць іх густы, разбірацца ў кінематаграфіі, пастаянна сачыць за навінкамі кінастужак, ну і, вядома ж, рэгулярна папаўняць запасы DVD-дыскаў з якасным ліцэнзійным відэа. Апошніх у нас ужо назбіралася 764, так што выбраць ёсць з чаго. Фільмы для дарослых у раённым Доме культуры дэманструем кожную сераду і чацвер (пачатак — у 19.00), суботу і нядзелю (18.00), а маленькіх гледачоў чакаем па пятніцах (18.00) і ў выхадныя дні (11.00). Дарэчы, у аўторак, 17 снежня, мы правядзём акцыю «Кіно маёй краіны». У яе рамках для ўсіх узроставых катэгорый гледачоў прадэманструем лепшыя фільмы айчыннай кінаіндустрыі, раскажам пра гісторыю стварэння беларускага кіно. Запрашаем усіх жадаючых прыняць удзел у акцыі.
Якім стужкам аддаюць перавагу ўшачане, што прыходзяць на нашы сеансы? Розным: ад сучасных баевікоў і фільмаў жахаў да класікі айчыннага кінамастацтва — доўгі час карыстаюцца вялікай папулярнасцю ў нашых гледачоў фільмы «Брэсцкая крэпасць», «Анастасія Слуцкая». Ну і, канечне ж, мультфільмам, бо асноўная маса нашых наведвальнікаў — дзеці.
Раней падчас паказу цікавага кіно зала заўсёды была запоўнена. Сёння сітуацыя крыху змянілася: актыўнае развіццё тэлебачання і інтэрнэту зрабілі сваю справу. Але хаця людзей на сеансах стала менш, затое сфарміраваўся пастаянны глядач. Той, хто цэніць якасць малюнка і гуку, для каго паход у кіно — сапраўднае свята ў шэрагу аднатыпных будніх дзён. Радуе, што ёсць у нас такія гледачы, якія прыходзяць да нас амаль кожны тыдзень.
Некалькі слоў скажу пра наш калектыў. На сённяшні дзень у структуры кінавідэасеткі раёна працуе 12 чалавек, з якіх 9 — відэадэманстратары. Усе яны адказна ставяцца да сваіх прафесійных абавязкаў, паказваюць даволі высокія вынікі дзейнасці. Усіх работнікаў райкінавідэасеткі, ветэранаў арганізацыі віншую з Днём беларускага кіно, жадаю людзям, якія займаюцца арганізацыяй і дэманстрацыяй фільмаў, цярпення, добрай матэрыяльнай і тэхнічнай базы, прафесійнага росту і прызнання, а таксама здароўя, шчасця і сямейнага дабрабыту.
На здымку: відэадэманстратары В.А.Візгалава (Ільюшына), А.В.Сальнік (Жары), дырэктар прадпрыемства М.П.Макрыдзіна, відэадэманстратар В.П.Кладніцкая (Вяркуды), майстар Т.М.Мацюшэнка, відэадэманстратар Я.А.Сталярэнка (Селішча), галоўны бухгалтар М.А.Емельянава, відэадэманстратар А.У.Дзегцяроў (г.п.Ушачы).
К.КАВАЛЕЎСКАЯ.