Напрыканцы 2014 года на Ушаччыне завяршыўся другі (раённы) этап рэспубліканскай алімпіяды па вучэбных прадметах. Праходзіў ён тры дні, што дало вучням 8-11 класаў шанс паспрабаваць свае сілы адразу па некалькіх прадметах. Дарэчы, скарысталіся гэтым адзінаццацікласнікі Ушацкай школы Караліна Банеўская і Ілья Клачок, а таксама дзевяцікласніца Кубліцкай школы Ксенія Паршонак.
Як заўсёды, актыўнымі ўдзельнікамі другога этапу алімпіяды сталі вучні Ушацкай школы (дарэчы, каманда гэтай установы была прадстаўлена па ўсіх 14 прадметах), а сярод сельскіх – Арэхаўскай, Ільюшынскай, Вяркудскай і Плінскай. Найбольш запатрабаванымі ў юнакоў і дзяўчат прадметамі, па якіх яны пажадалі выступіць, сталі руская мова і літаратура (17 удзельнікаў), матэматыка (12), беларуская мова і літаратура, біялогія (па 11), геаграфія (10) і працоўнае навучанне (6 – тэхнічная праца, 7 – абслугоўваючая).
Па выніках інтэлектуальных спаборніцтваў 33 школьнікі раёна заваявалі 41 дыплом: 8 – першай ступені, 10 – другой, 23 – трэцяй. Паспяховым было выступленне каманды Ушацкай школы, на рахунку якой 28 дыпломаў па 13 прадметах. Чатырма дыпломамі адзначаны вучні Арэхаўскай школы, трыма – Ільюшынскай і Плінскай, двума – Глыбачанскай, адным – Кубліцкай. Высокі ўзровень падрыхтоўкі прадэманстравалі ўшацкія школьнікі Павел Гардзіёнак (9 клас, настаўніца Л.І.Данькова) – па нямецкай мове, Ганна Герцык (10 клас, настаўніца В.В.Спірчонак) – па беларускай мове і літаратуры, Дзмітрый Ланцунцэвіч (9 клас, настаўніца В.А.Жыткая) – па біялогіі, Эльвіра Трафімава (9 клас, настаўніца Л.В.Трафімава) – па рускай мове і літаратуры, а таксама вучань Плінскай школы Віталь Федарэнка (9 клас, настаўнік С.З.Яскевіч) – па тэхнічнай працы і вучаніца Арэхаўскай школы Вераніка Каваленка (10 клас, настаўніца Т.В.Алексяёнак) – па абслугоўваючай працы.
Цяпер алімпіяднікі раёна грунтоўна рыхтуюцца да ўдзелу ў абласным этапе рэспубліканскай алімпіяды, які пройдзе ўжо на наступным тыдні. У склад каманды Ушаччыны ўключана шасцёра школьнікаў.
Г.СТРУЙ, галоўны спецыяліст аддзела адукацыі, спорту і турызму райвыканкама.
