Тут цэлая сістэма клетак, кожная з якіх мае сваё прызначэнне, і нават пад падлогай ёсць загоны для ўтрымання трусоў – кожны сантыметр плошчы ў невялічкім хляве выкарыстоўваецца з толкам, дзякуючы чаму на 12,5 квадратных метрах Васіль Іванавіч Гардзіёнак умудраецца трымаць пад сотню галоў. Больш таго, разам з імі на невялікай тэрыторыі без праблем ужываюцца і дзве козачкі, а прадукцыі гэтай мініфермы з лішкам хапае для “харчовай бяспекі” асобна ўзятай сям’і.
– Малако казы ўтрымлівае вітаміну А больш каровінага ў два разы, – з веданнем справы расказвае Васіль Іванавіч.– Ад сваіх за дзень атрымліваю па тры літры, а вось племянныя чэшскія козы, якія даюць да 6 літраў малака за дзень, ёсць у гаспадара ў Лепельскім раёне, але каб іх набыць, людзі гадамі чакаюць чаргі.
Зорка і яе двухгадовая дачка Маша – жывёлы бязрогія і вельмі паслухмяныя. Ад хлявоў, дзе ўладальнікі кватэр дамоў па вуліцы Ленінскай трымаюць жывёлу, да базы ПМК66 В.І.Гардзіёнак са сваімі козамі можа хадзіць без павадка. “Яны нікуды ад мяне не адыходзяць, адданыя, як сабакі, нават калі насустрач хто ідзе, то яны бляяннем мяне папярэджваюць!”. Адходы піламатэрыялаў з будаўнічай арганізацыі Васіль Іванавіч накіроўвае на будоўлю жылля для “вушастай” часткі сваёй гаспадаркі, а пілаванне ідзе на подсціл, бо трусы адчуваюць сябе камфортна і радуюць гаспадара прывагамі толькі ў чысціні, якая, як вядома, з’яўляецца залогам здароўя не толькі для людзей, – клеткі ўбіраюцца рэгулярна.
Звяркам патрэбна свежае паветра, таму для вентыляцыі ў столі памяшкання зроблены люкі: меншы адкрываецца зімой, большы – летам. Гэта адзін з нюансаў, якіх трэба ведаць вельмі многа, таму Васіль Іванавіч прачытаў не адну сотню старонак спецыяльнай літаратуры. Зза такой кучнасці пражывання інфекцыі для трусоў смяртэльна небяспечныя, але ў гэтай справе скрупулёзны гаспадар адступіў ад кніжнай навукі і прышчэпкі трусам зараз не робіць – дорага. Аднойчы пайшоў на эксперымент: ушчыльніў адтуліны памяшкання плёнкай, завесіў мешкавінай дзвярны праём хлеўчука – перакрыў шлях камарам і мухам. Павышаныя санітарныя патрабаванні з’яўляюцца і адной з прычын таго, што Васіль Іванавіч не трымае свіней. Зімой пагалоўе тут адносна невялікае, а вось да пачатку лета, калі з’яўляецца дастаткова травы, яго колькасць узрастае да 7080 галоў.
Свайго першага труса ён завёў яшчэ 15гадовым юнаком, калі жыў у Лепельскім раёне. Пражыў звярок у Васіля Іванавіча зусім нядоўга – кот суседа “пастараўся”. Але ж галоўнымі ворагамі для жыхароў клетак з’яўляюцца пацукі. Гаспадар расказвае, што драпежнік, які прарваўся ў клетку, знішчыў увесь прыплод з памёту акрамя аднаго трусяня, які “падкаціўся” пад самку. Ад няпрошаных гасцей заўсёды ставіць атруту, а брусы і рэйкі, прылягаючыя пры будаўніцтве клетак да сцен хлява, абавязкова абабівае жалезам, каб пацукі не прагрызлі сабе ходу.
Стаж у гэтым спецыфічным відзе жывёлагадоўлі ў Васіля Іванавіча набліжаецца да паўвекавога. І хоць для людзей у гадах поснае дыетычнае мяса трусоў карыснае, але ж і праца па доглядзе за імі для чалавека ва ўзросце не з лёгкіх. Трусоў выгадна трымаць у выпадку, калі кармы свае, а не пакупныя. Зімой аснова рацыёну складае зерне, сена і караняплоды, летам – трава, у асноўным канюшына. Каб выкарміць аднаго труса да ўзросту забою (каля 6 месяцаў), трэба 2330 кілаграмаў зерня, 20 кілаграмаў сена і пуд агародніны. Вада павінна быць свежай і зімой, і летам, а траву, наадварот, неабходна даваць сухой. Складанасць у тым, што не паўсюдна яе і адкосіш: у нашай мясцовасці расце больш 10 відаў, якія для трусоў ядавітыя або шкодныя для здароўя. 17 сотак канюшыны, што Васіль Іванавіч сеяў мінулым летам, не хапіла. Выручаюць знаёмыя – нарыхтоўваў сена на ўчастку суседа. Апроч гэтага садзіць буракі, таксама на корм ідзе дробная бульба, нестандартная морква, капусныя лісты.
Ёсць і спецыялізаваныя кармы, камбінаваныя, але каштуюць яны дорага, ды і ў нас іх адшукаць складана. У працэсе адкорму ёсць свае сакрэты і напрацоўкі. Кармушкі для сухога корму сканструяваныя такім чынам, што залезці жывёла туды не можа, але дастае корм свабодна – таму, напрыклад, зерне можна насыпаць і з запасам. Звяркі цягаюць сухую траву праз металічную сетку. Асобная гордасць гаспадара – матачнікі для атрусення, дзе гняздо зроблена па спецыяльнай тэхналогіі, якая дапамагае выжываць маладняку ў неацепленым памяшканні нават у мароз.
Васіль Іванавіч сцвярджае, што нават пачынаючаму трусаводу рэальна ад адной самкі атрымаць дватры вывадкі маладняку за сезон. Нармальным лічыцца нараджэнне пяці малых, але бывалі выпадкі, што самка нараджала 13 – і ўсе выжывалі. Ад здаровай маладой самкі “ў ідэале”, можна атрымаць да чатырох прыплодаў за год. Трусы хутка дасягаюць рэпрадуктыўнага ўзросту і ўжо праз тры месяцы самак ад самцоў адсаджваюць.
З адной дарослай жывёлы атрымліваецца 22,5 кілаграмы мяса. Пароды ў Васіля Іванавіча разнастайныя, зараз пераважаюць белы і шэры веліканы, шыншылы і бельгійскі фландэр. За гады вопыту разабраць адну жывёліну за 1012 хвілін для яго не складае ніякіх цяжкасцяў. Тушкі на спецыяльнай прыладзе раздзяляюцца на мяса, якога хапае радні, знаёмым і сябрам, а шкуркі амаль заўсёды ідуць у адходы. Цана на іх зараз не вартая намаганняў па выпрацоўцы футра, ды і рэалізаваць складана – больш патраціш на паліва для дастаўкі ў Віцебск.
– Каўбасу ў магазіне мабыць і не набываеце? – пытаюся ў Васіля Іванавіча.
– Чаму ж, купляю для разнастайнасці, – усміхаецца суразмоўца. – Аднак, канечне ж, не часта.
Падсобная гаспадарка заўсёды дапамагала яму падтрымліваць сямейны бюджэт, асабліва ў цяжкія дзевяностыя і калі вучыўся сын. У наш час не кожны сельскі жыхар трымае на падворку скаціну. А вось у Васіля Іванавіча доміка на вёсцы няма, але дзякуючы працавітым рукам і кемлівасці аддача з невялікай падсобнай гаспадаркі, па яго словах, “не горш чым з вялікай дачы”.
Дзмітрый Раманоўскі.
где он проживает?
Он проживает в Ушачи Подумаешь кролики и козы Вон в Ушачи женщина держит две коровы