Жыхары мікрараёна па вуліцы Віцебскай ўжо прывыклі да таго, што тэхніка будаўнічых арганізацый працуе тут амаль без выхадных. Не заціхаюць работы на фізкультурнааздараўленчым комплексе, камунальнікі вядуць планавую замену цеплатрасы, не менш ажыўлена і за агароджанай тэрыторыяй будучага 40кватэрнага жылога дома. Вынік працы будаўнікоў хутка можна будзе ўбачыць здалёк – у чацвер муляры Ушацкай ПМК-66 прыступілі да кладкі сцен.
У нашым раёне гэта першы дом долевага будаўніцтва з падтрымкай дзяржавы. Усе дольшчыкі, якія маюць патрэбу ў жыллі ці паляпшэнні ўмоў, атрымаюць ільготны крэдыт на будаўніцтва кватэры ў адпаведнасці з Указам Прэзідэнта краіны №13 ад 6 студзеня 2012 года і пры неабходнасці будуць уносіць уласныя сродкі. У цяперашні час з упраўленнем капітальнага будаўніцтва Ушацкага раёна, якое выступае заказчыкам, заключана 26 дагавораў долевага будаўніцтва, у спісы на атрыманне льготнага крэдыту рашэннем райвыканкама ўнесена 15 дольшчыкаў.
Першымі да працы на аб’екце са снежня мінулага года прыступілі цеслярыбетоншчыкі.
– Завяршылі так званую “падземную” частку будоўлі, – праводзіць мяне па тэрыторыі галоўны інжынер ПМК66 Аляксандр Уладзіміравіч Клопаў. – Скончаны работы па ўкладцы сетак водаправоду і каналізацыі, устаноўцы фундамента і пліт перакрыцця, асновы пад кладку. Зараз далучыцца да работ і наш генпадрадчык – Шумілінская ПМК70: адзін пад’езд будзем будаваць мы, адзін – яны. Па праекце тэрмінам здачы аб’екта значыцца снежань бягучага года, калі не ўзнікне праблем з фінансаваннем.
Цеслярамбетоншчыкам хапае работы і зараз – паралельна з закладкай сцен дома вядзецца і добраўпарадкаванне. Замінаць будоўлі, падвозу матэрыялаў гэта не будзе – кран устаноўлены з другога боку. Брыгада зладжана працавала над абсталяваннем аўтамабільнай стаянкі. Экскаватар выбіраў гліністы грунт, які заменяць гравіем пад асфальтаванне, а рабочыя абазначалі контур пляцоўкі бардзюрным каменем.
– Вельмі добра, што строіцца новы дом, – гаворыць брыгадзір Дзмітрый Пецкалёў. – Людзі вырашаць кватэрнае пытанне, а ў нас ёсць аб’ёмы, зарплата. Будуем для землякоў, стараемся. Адзін са старажылаў нашай арганізацыі, Мікалай Пятровіч Коршун – асабліва, бо ў спіс будучых навасёлаў трапіў яго сын!
Муляры, рыхтуючыся да кладкі, вязалі з арматуры сетку, малады прараб Мікалай Грыневіч схіліўся над праектам будынка.
– Складаней тут прыйдзецца, чым на апошніх дамах гарпасёлка, – зазначае ветэран ПМК66 Віктар Шайтар, які будаваў усю Віцебскую. – Іншая планіроўка, кватэры розных памераў. Але справімся, паколькі не меней за будучых уладальнікаў кватэр радуемся закладцы дома, які для нас гарантуе наяўнасць работы на месцы і практычна на год. Не было б перабояў з матэрыяламі, фінансаваннем.
Гэта ўжо залежыць ад будучых уладальнікаў жылля, дольшчыкаў, бо дзяржава ўзятыя на сябе абавязкі выконвае. У мэтах своечасовай здачы жылога дома ўсім дольшчыкам неабходна ў максімальна сціслыя тэрміны аформіць усе неабходныя дакументы. Пасля ўводу аб’екта ў эксплуатацыю кватэры перададуцца жыльцам пры ўмове аплаты кошту долевага будаўніцтва, а агульная маёмасць будзе належыць створанаму таварыству ўласнікаў.
Д.Раманоўскі.