Ва ўсіх кінатэатрах нашай краіны адбылася доўгачаканая прэм’ера гістарычнай драмы “На другім беразе” ад нацыянальнай кінастудыі “Беларусьфільм” рэжысёра Андрэя Хрулева.
Кінакарціна расказвае гледачам кранальную гісторыю пра жыццё ў Заходняй Беларусі, далучанай Рыжскім мірным дагаворам да Польшчы. Дзеянні разгортваюцца ў 1925 годзе ля мяжы Заходняй Беларусі і БССР, дзе пражывае галоўны герой фільма Павел Смоліч разам са сваёй маці. Ён назірае, як польская ўлада імкнецца падпарадкаваць сабе беларусаў, выкараніць мову, культуру і веру. Хваляванні, партызанская вайна, жорсткае падаўленне любых спроб захаваць нацыянальную ідэнтычнасць – усё гэта праз гісторыю галоўнага героя ўбачылі і жыхары Ушаччыны. Увесь тыдзень у зале раённага цэнтра культуры “круцілі” кінастужку. Мы пацікавіліся ва ўшачан, якія ўражанні яны атрымалі ад прагляду.
Валянціна Грыневіч: “Наш калектыў цэнтра культуры, зразумела, паглядзеў стужку адным з першых. І ніхто не застаўся раўнадушным. У фільме ёсць усё, што блізка кожнаму чалавеку: боль ад страты блізкіх, умацаванне веры ў справядлівасць, калі страчана надзея, каханне, якое вяртае сэнс жыцця. Падзеі ў фільме захопліваюць літаральна з першых хвілін. Рэкамендую паглядзець яго ўсім, хто не трапіў на прэм’еру”.
Дар’я Жаваранак: “Не прыхільніца гістарычных фільмаў, аднак гэтая стужка спадабалася. На мой погляд, дастойна сыгралі свае ролі маладыя акцёры. Прыгожа гучыць наша беларуская мова. На прыкладзе адной сям’і карціна зразумела і даступна паказвае гісторыю ўсяго беларускага народа ў гады знаходжання заходняй часткі нашай краіны ў складзе Польшчы. Фільм прымушае задумацца пра тое, як важна берагчы мір на роднай зямлі”.
Вераніка Пацэйка: “Пра тое, што адбывалася на тэрыторыі нашай краіны стагоддзе таму, цяпер мы можам даведацца пераважна з падручнікаў гісторыі. Гэтая інфармацыя, безумоўна, важная. Аднак сухія факты і даты не заўсёды могуць дапамагчы адчуць, што перанеслі людзі, якія жылі на гэтых землях і апынуліся пад польскім прыгнётам. А падчас прагляду быццам акунулася ў тыя падзеі. Сюжэт захоплівае, і дзве гадзіны прагляду праляцелі імгненна”.
За тыдзень больш за 600 чалавек праглядзелі кінафільм у раённым цэнтры культуры. Па шматлікіх просьбах кінапаказы прадоўжацца да 1 кастрычніка. Пачатак штодня ў 18.00 (акрамя панядзелка). Кошт білету – 2 рублі для дарослых і 1 – для дзяцей. Даведкі і браніраванне білетаў па нумары 5-74-28.
Падрыхтавала Вольга КАМАРКОВА.
