Конкурсам прафесійнага майстэрства традыцыйна адзначылі Міжнародны дзень медыцынскай сястры ва Ушацкай цэнтральнай раённай бальніцы. Шэсць прадстаўніц гэтай прафесіі, якія пачалі працоўную дзейнасць менш года таму, не пабаяліся ўступіць у барацьбу за званне самай лепшай.
Ужо падчас візітоўкі ўсе прызналіся, што прыйшлі ў прафесію “па любові”. Так, Юлія Каваленка, якая зараз працуе ў кабінеце функцыянальнай дыягностыкі, расказала, што да спаўнення такой сваёй дзіцячай мары ішла доўгія гады: паспела атрымаць адукацыю прадаўца і папрацаваць у магазіне, нарадзіць дзвюх дачок, стаць санітаркай і ўрэшце падаць дакументы на паступленне ў Аршанскі медкаледж. Шчаслівай называе сябе медсястра агульнай практыкі Глыбачанскай БСД Вераніка Алексяёнак: з выбарам прафесіі яна дакладна не памылілася – адчувае сябе ў ёй патрэбнай. Не адразу знайшла свой шлях Ганна Міхейка: адвучылася на повара, працавала ім у Маскве, а калі вярнулася на радзіму, вырашыла кардынальна ўсё змяніць – цяпер дапамагае доктару прымаць пацыентак у жаночай кансультацыі. З дзяцінства марыла пра медыцыну рознабаковая ў інтарэсах Аляксандра Залатая, якая працуе ў інфекцыйным аддзяленні. Мела ўсе шансы звязаць жыццё з музыкай ці харэаграфіяй загадчык Арэхаўскага ФАПа Анастасія Качан. У старэйшых класах загарэлася ідэяй стаць медыкам Дар’я Кісялёва, якая прымае пацыентаў у Сарочынскім фельчарска-акушэрскім пункце – дзяўчыну, якая вырасла ў мнагадзетнай сям’і, натхніла на гэта сустрэча з выкладчыкамі Полацкага медкаледжа, якія прыязджалі ў школу.
Прафесіяналізм удзельніц засведчыў другі этап конкурснай праграмы. Па апісаных сімптомах маладыя спецыялісты ставілі дыягназ – інфаркт міякарда, ацёк Квінке, гіпертанічны крыз, апісвалі схему дзеянняў пры аказанні неадкладнай меддапамогі. З практыкай праблем таксама не ўзнікла: упэўнена накладвалі кампрэс на вуха, спавівалі малыша, праводзілі сардэчна-лёгачную рэанімацыю…
Парадаваў і конкурс дэманстрацыі захапленняў. Смачнымі дэсертамі пачаставала прысутных Юлія, якая любіць да таго ж рыбалку, кемпінг, займаецца фатаграфіяй. Толькі частку спартыўных узнагарод (але і ёй пазайздросцілі б многія!) прэзентавала Вераніка, якая ў свой час скончыла дзіцячую школу мастацтваў па класе фартэпіяна, а зараз спрабуе сябе ў маляванні. Сапраўдную экспазіцыю творчых работ – ад карцін па нумарах да вышытых крыжыкам – прадставілі Дар’я і Ганна. Выдатным яе дапаўненнем сталі прыгожыя вырабы з бісеру – справа рук Анастасіі. Ну а Аляксандра, якая ў школьныя гады займалася танцамі, у студэнцкія – тэнісам і валейболам, прызналася, што любіць літаратуру. Верш пра маці ў яе выкананні расчуліў усіх – выступленне дзяўчыны адзначана падарункам ад раённай арганізацыі РГА “Белая Русь”.
За прафесіяналізм і сумленную працу Граматамі Ушацкай ЦРБ галоўны ўрач Ю.Пацёмкін узнагародзіў медыцынскіх сясцёр Ірыну Мошкіну з хірургічнага аддзялення (на здымку), Таццяну Шалак і Ганну Лукашэвіч з неўралагічнага і афтальмалагічнага кабінетаў паліклінікі, Юлію Мамонаву з аддзялення анестэзіялогіі і рэанімацыі, а таксама Алену Філімонаву з Вялікадолецкай бальніцы сястрынскага догляду.
Гледачы актыўна падтрымлівалі канкурсантак, ды і самі між этапамі дэманстравалі клас у вясёлых заданнях медыцынскай тэматыкі. Падарункі ад Ушацкай ЦРБ і прафсаюзнай арганізацыі ўстановы атрымалі ўсе шэсць дзяўчат, трох дадаткова падтрымаў райкамам БРСМ. Перамогу ж святкавала ў гэты дзень В.Алексяёнак.
– З такімі кадрамі трапляць у бальніцу дакладна нястрашна! – выказала ўпэўненасць, уручаючы ўзнагароды, член Савета Рэспублікі Нацыянальнага сходу Рэспублікі Беларусь, старшыня раённага Савета дэпутатаў Наталля Марковіч. – Яшчэ раз упэўнілася: у медыцыне выпадковых людзей няма і быць не можа!
Кацярына КАВАЛЕЎСКАЯ.
