Тэма гандлёвага абслугоўвання актуальная заўсёды, адпаведна на “прамыя лініі”, якія датычацца дзейнасці Ушацкага райспажыўтаварыства, кожны раз паступаюць тэлефанаванні ад нашых чытачоў. Апошняя не стала выключэннем і за гадзіну старшыні праўлення асноўнай гандлёвай арганізацыі нашага раёна Ліліі Альбінаўне ДОЛГАЙ давялося даць адказы на некалькі пытанняў.
Жыхары вёскі Старынка скардзіліся, што днямі ім прыйшлося доўга чакаць прывозу малочнай прадукцыі: “Пасля выхадных хацелі купіць свежыя прадукты, чакалі аж да закрыцця магазіна! Спадзяёмся, што гэтаму былі аб’ектыўныя прычыны і такі графік завозу не ўвойдзе ў практыку”.
Як паведаміла Лілія Альбінаўна, малочная прадукцыя завозіцца ў Старынку два разы на тыдзень – у аўторак і пятніцу, а гандлёвая кропка працуе да трох гадзін. І сапраўды, як высветлілася, сітуацыя, на якую скардзіліся вяскоўцы, адбылася па тэхнічных прычынах: аўтамабіль, які ў гэты дзень развозіў тавары па ільюшынскай зоне, выйшаў са строю. “Малочка” была завезена ў названы магазін, але са спазненнем. “Будзем прыкладаць усе намаганні, каб падобных сітуацый не ўзнікала”, – заверыла старшыня.
Мужчыну цікавіла пытанне здачы бытавога металалому – ці могуць нарыхтоўшчыкі прыехаць на яго падворак і забраць, бо самому вывезці складана.
– На жаль, мы не маем такой магчымасці, – дала адказ Лілія Альбінаўна. – Работнікі райспажыўтаварыства не могуць выязджаць за металаломам да ўсіх жадаючых, грамадзяне павінны самі прывозіць адходы металаў у нарыхтоўчы пункт у гарпасёлку.
Наступнае пытанне датычылася набыцця тавараў у гандлёвых кропках райспажыўтаварыства: “Чула, што каб купіць якую-небудзь дарагую рэч, можна аформіць у банках крэдыт на спажывецкія тавары пад 0,01 працэнт. А яшчэ ў канцы месяца бываюць акцыі, калі дзейнічае скідка 15 працэнтаў ад рознічнага кошту тавару. А калі афармляеш крэдыт на тавар у перыяд дзеяння акцыі, 15-працэнтная скідка застаецца?”
Скарыстацца можна або крэдытам, або акцыйнай скідкай – Л.А.Долгая патлумачыла, што на акцыйныя тавары спажывецкі крэдыт не выдаецца, і нагадала, дзе і на які тэрмін яго можна атрымаць:
– Купіць дарагую рэч або некалькі адным плацяжом, канечне, многім складана, а таму ўшачане карыстаюцца прыгаданай магчымасцю. Тэрмін жа, на які выдаецца крэдыт на набыццё тавараў у нашых магазінах, залежыць ад кошту пакупкі, плацежаздольнасці грамадзяніна: у “Белаграпрамбанку” ён выдаецца на 4, 6 і 10 месяцаў, у “Беларусбанку” – ад трох месяцаў да года.
Падрыхтавала Вольга КАМАРКОВА.
